Matasip aalisakkanit nioqqutissaq eskimomik taaguuteqartoq nioqqutigiunnaaraa
Oqaatsip eskimop nioqqutissani atorneqarnera pissutigalugu aasaq manna oqallittoqangaatsiarpoq. Oqaaseq inuit ilaannit narrujuumminartutut isigineqarpoq, Matasillu oqallinneq pissutigalugu aalisakkanit uuliap Eskimo-3-p nioqqutigineqarnera unitsikkallarpaa.
Matasip attaveqaqatigiinnermut pisortaa, Klaus Fridorf taama paasissutissiivoq.
- Aasaanerani oqallinneq malinnaaffigaarput, taanna oqarpoq
AAMMA ATUARUK Sikunik nioqqutissiortup Hansens Is-ip sikuliani Eskimo allamik atseraa
- Aalisakkanit uuliamit nioqqutissiortoq oqallinnermik maanna aamma malugiaatillugulu aqqanik aalajangeeqqusivugut.
Svenskip nioqqutissiortup Midsonap aaqqiissuteqarnissaanut – ajornanngippallu aqqanik allanngortitsinissaanut aalisakkanit uuliap Matasip pisiniarfiini nittartagaanilu nioqqutigineqarnera unitsikkallarneqarpoq.
Atuisartup nioqqutissap aqqa assuarnartuliornerusorigaat
Matasimi atuisartut qassiiusut nioqqutissamut atatillugu saaffiginnissillutik aqqa assuarnartuunerarsimagaat, Klaus Fridorfip paasissutissiissutigaa.
Pisisartut qasserpiaat saaffiginnissimanersut Matasip ataatsimoortumik kisitsisaatinngilaa.
AAMMA ATUARUK Edmonton Eskimoes atertik allanngortittussanngoraat
- Nioqqutissap aqqa inuit ilaannut narrujuumminarsinnaanera isumaqatigaarput. Tamanna tamatta aasaanerani ilisimasaqarfigilerparput, Klaus Fridorf oqarpoq.
- Taaguutip Eskimop atorneqarneranut tunngaviusumik isumaqarnikuusimanngilagut, aasaaneranili oqallinnerup imarisaatigut taaguutip narrujuumminarsinnaanera paasisinnaavarput, tamannalu svenskinut pisiortorfitsinnut soorunami oqaloqatigiissutigigaarput.
Sikup katersugaasiviullu taaguut atorunnaaraat
Den Danske Ordbog naapertorlugu oqaaseq ”eskimo” isumaqarpoq ”asiamiut inoqqaavi Issittumi Kalaallit Nunaanni najugaqartut”.
Oqaaserli narrujuumminarsinnaasoq oqaatigineqarpoq, aamma Canadap avannarpasissuani, Alaskami Sibiriallu ilaani inuiaqatigiit oqaaseq ”inuit” atorusunnerugaat allassimalluni.
AAMMA ATUARUK Danmarkimi katersugaasiviup issittoq pillugu saqqummersitsinerni oqaaseq eskimo atorunnaaraa
Sikunik nioqquteqartartup Hansens Is-ip siku ”Kæmpe Eskimo” qanittukkut allamik atserpaa.
Aammattaaq Danmarkimi Katersugaasiviup oqaatsip issittumut tunngasunik saqqummersitanit ”Eskimoer og Grønland”-imit aamma atorunnaarneqarnissaa kalerriutigaa.
