SIK Siumup oqaatsit pillugit siunnersuutaanut: Massakkut piviusorsiunngilaq
Nunatsinnni pisortat suliffeqarfiutaanni kalaallisut oqalussinnaanissamik piumasaqartoqartalernissaa pillugu Siumumi ilaasortat ataatsimeersuarnerisa nalaanni oqaluuserisassamik qaqitsisoqarmat oqallittoqalaavissorpoq.
Sulisitsisuttaaq tamanna pillugu ulluni kingullerni oqaaseqartinneqarput taakkulu isumaqarput taamaaliortoqalissappat tamanna avataaniit tikikkusuttunut ajornakusoortitsiinnartussaasoq. (Allaaserisaq ikkullugu)
Sulinermilli inuussutissarsiuteqartut kattuffiat SIK Siumup taama saqqummiussineranut qanillattornerumaarpoq. Isuma ajunngilaq, takorlooruminaapporli piviusumik atuutsilernissaa, kattuffiup siulittaasua Jess G. Berthelsen oqarpoq:
- Taamatut piumasaqartoqarnera immini ajunngilaq, sulisussaaleqinerli taamak qaffasitsigitillugu piviusorsiunngilaq. Qularutiginngilaralu Namminersorlutik Oqartussat marlunnik oqaasilimmik ajornanngippat atorfinititserusussasut, taanna KNR-mut oqarpoq.
Politikerit ungasissumut isiginninngillat
Kalaallit suliffinni salliutinneqarnerunissaanik Siumup siunnersuuteqarnera Jess G. Berthelsenip taperseraluarlugu piviusumut sanilliullugu equngasoqarpallaarsoraa.
- Piviusunngortissinnaanngisatsinnik inatsisiliornissarput mianersuutissavarput, taamaalioraluaruttami immitsinnut aaginnassaagut, ukiunut 20-nut isigisumik pilersaarusiortariaqarpugut. Taannaavorlu tassa aallarniutissarput – pilersarusiorneq, Jess G. Berthelsen oqarpoq.
Taassuma politikerit uungaannaq ukkassinerujussuannut piviusorsiunnginnerannullu mittarfiliortiterneq assersuutigaa:
- Mittarfiliornerit ataatsikkut pingasut ingerlassat aallarniutigaagut, tamannalu avataaniit tikisitsinermik nassataqarpoq. Kittaarlugit sanaartorneqartuuppata nunaqavissut atorneqarluarsimasinnaagaluarput, taanna oqarpoq.
Kulturi uuttortarneqarsinnaananilu oqimaalutarneqarsinnaanngilaq
Taamatuttaaq SIK-p siulittaasua isumaqarpoq, Siumukkut siunnersuutaat inuiaqatigiinnut akisoorujussuarmik tussinnaasut.
Maannami siunnersuutigineqarpoq sulisitsisut kalaallisut oqalussinnaanngitsumik atorfinititsissagaluarpata tamanna suliffeqarfimmut kinguneqartalissasoq. Akiliisitsisoqartalernissaanilli isuma Jess G. Berthelsenip annilaarutigaa – kinami akiliisalissagami?
- Taamatut inatsisiliussagutta akileraarutikka atorlugit akiliisalerusunngilanga, tamannalu massakkorpiaq atuutsinneqarsinnaanngilaq, taanna oqarpoq nangipporlu:
- Paasisinnaanngilara Namminersorlutik Oqartussat matumani taamaallaat pineqassappat, ilumoorunneqassappammi kikkunit tamanit atuutsinneqartariaqaraluarpoq, aamma namminersorlutik suliffiutilinni.
Jess G. Berthelsenip aamma takujuminaatsippaa, sulisitsisup qinnuteqartup nunatsinnik kulturitsinnillu qanoq ilisimasaqartigineranik qanoq ililluni naliliisinnaanissaa.
- Kulturimi allanngorartuartuuvoq. Oqartariaqarpungali maani nunami sulissagaanni nuna inuuffigisaq ataqqisariaqarpoq, tamatumani inatsisai oqaatsillu atorneqartut aamma ataqqillugit, taannaavorlu minnerpaamik piumasarisinnaasarput.
