Masanti: Ilaserineqarsimasariaqaraluarpugut
Kalaallini ingeniørinik, arkitektinik teknikerinillu siunnersuisartunik sulisoqartoq Masanti isumaqarpoq nunatsinneersut peqatigalugit pikkorissartitsineq pilersinneqarsimasinnaagaluartoq.
Naalakkersuisut sanaartornermi pipallatat iliuuseqarfiginiarpaat
Kalaallini ingeniørinik, arkitektinik teknikerinillu siunnersuisartunik sulisoqartoq Masantimi pisortaq isumaqarpoq aqutsisunik pikkorissaasalernissamik suliniut pitsaasoq. Apeqquserpaali sooq Kalaallit Nunaanniit suleqateqannginnersoq.
- Eqqumiigivara nunatsinniit peqataatitaqarsimannginnamik. Nalunngilara Kalaallit Nunaaniit sanaartonerup tungaatigut piginnaasaqartoqartoq, ilinniartitsinermillu piginnaasaqartunik. Kalaallit Nunaanniit suleqateqarlutik pikkorissartitsisinnaagaluarput, Masanti-imi pisortaq Morten Gosvig oqarpoq.
Ukiut kingulliit ingerlanerani illuliortiternerit iluarsaassinernillu suliaqarnerit arlallit suliarineqarneranni suliat ingerlanerini naammaginanngitsumik pisoqartarneri amerliartuinnartut Namminersorlutik Oqartussat misigisarpaat.
Sanaartornerit ingerlaneranni kukkunernik amigaatiginillu iluseqartunik pitsaassutsikkut ajornartorsiuteqartoqartarsimavoq, tamannalu immikkut aningaasartuuteqarnerunermik kinguaattoornernillu malitseqartarluni.
Tamakku annikillisinniarlugit ulluni pingasuni ilinniarfimmik pilersitsiniarpoq.
Ineqarnermut Naalakkersuisoq Siverth K. Heilmann isornartorsiorneqartoq pillugu oqaaseqartinniaraluaratsigu pissarsiarinngilarput.
