Naalakkersuisut sanaartornermi pipallatat iliuuseqarfiginiarpaat

Sanaartornermi pitsaassuseq ajornartorsiutaasimagaangat, tamanna kinguaattoornernik kinguneqarsinnaasarpoq, akisunerulersitsillunilu. Ajornartorsiutillu naammanngitsumik aqutsisoqarneranik aamma pissuteqarsinnaasarput.

Namminersorlutik Oqartussat ilinniartitaaneq nutaaq taamammat aallartinniarpaat, sanaartornerup taamaaliornikkut nukittunerulersinneqarnissaa anguniarneqassalluni. Naalakkersuisut tusagassiuutinut nalunaarummi ilaatigut taama allapput.

- Ukiut kingulliit ingerlanerani illuliortiternerit iluarsaassinernillu suloiaqarnerit arlallit suliarineqarneranni suliat ingerlanerini naammaginanngitsumik pisoqartarneri amerliartuinnarut Namminersorlutik Oqartussat misigisarpaat. Ilaatigut suliaqarnerit ingerlaneranni kukkunernik amigaatiginillu iluseqartunik pitsaassutsikkut erseqqilluinnartumik ajornartorsiuteqartoq paasineqartarpoq, tamannalu immikkut aningaasartuuteqarnerunermik kinguaattoornernillu malitseqartarpoq.

Ineqarnermut Naalakkersuisoq Siverth K. Heilmann, tusagassiuutinut ilaatigut taama allappoq.

Nunatsinni sanaartornermi ajornartorsiutit naammaguinanngitsumik aqutsisoqarneranit ilaatigut aallaaveqarsinnaasoq, taassuma oqaatigaa:

- Pitsaassutsini ajornartorsiuteqarnerit taakkua arlallit ilai sanaartornermik aqutsinerlunnermut imaluunniit aqutsinerup naammannginneranut tutsinneqarsinnaapput. Tamatumunnga pisooqataasoq aamma tassaasinnaalluarpoq suliaqartuni sanaartornerup suliassallu ingerlasarnera inernerisaalu assigiiinngitsumik paasineqartartoq, Ineqarnermut Naalakkersuisoq oqarpoq.

Ineqarnermut Naalakkersuisoqarfik Byggecentrum aamma Naalagaaffiup Sanaartornermik ilisimatusarfia SBi peqatigalugit pikkorissartitsinissamik neqerooruteqarpoq, Kalaallit Nunaanni sanaartornerup iluani qitiusut, sanaartornermi aqutsineq pingaarnerutillugu, sammineqassallutik.

Pikkorissaaneq Nuummi maajip 20-anit 22-anut ingerlanneqassaaq.