Martin Møller ujakkaarnermi Danmarkimi pissartanngorniunnermi kuultinnappoq
Pissartanngorniunnerit sapaatip akunnera ataaseq ingerlassapput, ullumilu angutit 15 kilometerinut ujakkaarnermi unammipput, arnat inuusuttullu 10 kilometerinut ujakkaarnermi unammillutik.
Nunarpullu sinnerlugu unammeqataasoq, NSP-meersoq Martin Møller angutit inersimasut unammineranni ajugaavoq, tulliulluni apuuttumit København Skiklubimeersumit Lasse Hulgaardimit 2 minuttinik 40 sekundinillu siulliulluni apuummat.
Nunatsinnit aamma unammiartoqataasoq alla, ASP-meersoq Karl Peter Kristensen unamminermi tassani pingajuattut apuuppoq, bronzennallunilu.
Aamma Nunatsinneersoq, Frederik Petersen, Karl Peter Kristensenimit 38 sekundinik kingulliulluni sisamaattut apuuppoq.
Inuusuttut unammineranni Nunatsinnit unammeqataasut kuultinnallutillu sølvinnapput.
SSP-meersoq Bjarne Hansen angutit 15-inik ukullit unammineranni siulliulluni apuuppoq, KS-69-imeersorlu Minik Nikodemussen tulliulluni apuulluni.
Bjarne Hansen aamma Minik Nikodemussen Arctic Winter Gamesimi unammeqataassapput.
Hannah Olsen kisimiilluni arnat 17-inik ukiullit unammineranni peqataavoq. Tassani ajugaavoq, arnallu inersimasut unammineranni sisamaattut apuulluni.
Aka Olsen angutit 17-inik ukiullit unammineranni ajugaavoq, Noah Noahsenilu angutit 19-inik ukiullit unammineranni aappaattut apuulluni.
Nunatsinni inersimasuni inuusuttunilu ujakkaallaqqinnerpaat Arctic Winter Gamesimullu peqataasussani ujakkaallaqqinnerpaat Danmarkimi pissartanngorniunnerni peqataapput, katillugit angutit qulingiluaallutik arnarlu ataasiulluni.
Pissartanngorniunnerit sapaatip akunnerata sinnerani ingerlanneqassapput, 50 kilometerinullu oqilaniunnermik arfininngorpat naggaserneqassalluni.
Martin Møllerip unammineqataaffigisami tamani ajugaaniarluni siornatigut oqaatigereerpaa, aqagulu ataasinngornermi ujakkaarutit sukuutserutinik unammisoqalerpat ajugaasussatut piukkunneqarpoq.
