Martha Lund Olsen: Sulisussaaleqineq kommunit aaqqittariaqarpaat
Taassuma Inatsisissatut siunnersuutip ukiaq manna siullermeerlugu suliarineqarnissaa aalajangiusimavaa.
Aamma meeqqat pisinnaatitaaffii qulakkeerniaqqullugit aammalu meeraq illersorniarlugu iliuuseqajaartarneq anguniaqqullugu Inatsisartunit suliakkinneqarsimanini innersuussutigaa.
Paasiniagassalli apeqqutaatillugit, inatsisip atuutilernissaa ukiumik affarmik kinguartittariaqalersinnaanera piareersimaffigaa.
Aamma atuaruk Martha Lund Olsenip meeqqat pisinnaatitaaffeqarnerulersinniarai
- Isumaqarpunga suliaq unitsinnagu ingerlattariaqaripput, taava imaassinnaavoq ukiup affaanik kinguartinneqartariaqartoq atuutilersinneqarnissaanut, kisianni Inatsisartut suliassaq una eqqartortariaqaraat isumaqarpunga, uangalu aalajangiusimavara inatsisissatut siunnersuutip inatsisartuni saqqummiunneqarnissaa, Martha Lund Olsen oqarpoq.
Kommunit sisamaasut tamarmik isornartorsiuillutik tusagassiorfinnut nalunaaruteqarput, suliassallu nukingiunneqarpallaarnerarlugit sulisumikkut piareersimannginnertik ilaatigut innersuussutigalugu.
Kisianni:
- Kommunit sulisussaaleqineq namminneq aaqqittariaqarpaat aamma sulisumik atugaasa pitsaanerulernissaat namminneq isumagisariaqarpaat, Isumaginninnermut Naalakkersuisoq oqarpoq.
Aamma kommunit sulisumikkut piareersimannginnerarlutik oqarnerat naalakkersuisup paasilluarsinnaavaa. Tassami kommunit 2009-mit kattussuunneqarput, aamma sipaaruteqartariaqarnermik ilaatigut malitseqartumik.
Kisianni taamakkaluartoq kommunit Namminersorlutik Oqartussanik suleqateqarlutik piginnaasaqarlualersinnaasut isumaqarluni.
- Kommunit aaqqissuussaanertik namminneerlutik aaqqissinnaavaat, akisussaaffiit sumiiffinnut assiginngitsunut tunniussorlugit, suliat sukkanerusumik suliarineqartalerlutik aamma pikkorissaanerit assigiinngitsut ingerlattuassavagut, soorunalimi uuma inatsisip pitsaanerpaamik atorneqalernissaa qulakkeerniarlugu, isumagininnermut Naalakkersuisoq Martha Lund Olsen taama oqarpoq.
Aamma atuaruk Kommunit: Inatsisissaq kinguartinneqarli
Meeqqanut ikiorsiisarneq pillugu inatsisissatut siunersuut inatsisartuni novemberip ulluisa 18-anni siullermeerneqassaaq.