Kommunit: Inatsisissaq kinguartinneqarli
Kisianni inatsisissatut siunnersuut aappaagumut kinguartinneqarnissaa
kommunit sisamat tamarmik isumagininnermut ataatsimiititaliaani siulittaasut ataatsimoorlutik tusagassiuutinut nalunaaruteqarlutik piumasaraat.
Siunnersuutip isummerfiginissaanut piffissakippallaarlutik, kommunalpolitikerit oqarput.
- Tusarniaanermi piffissaritinneqartoq sivikippallaarpoq,
Qeqqata kommuniani ilaqutariinnermut ataatsimiititaliameersoq Alfred Olsen taama oqarpoq,
Inatsisisssatut siunnersuut marloriarlugu tusarniaassutigineqarpoq, siullermik sapaatit akunnerini tallimani, taava aamma sapaatit akunnerini pingasuni, septembarip qulingiluaat tikillugu.
Aamma atuaruk Aviâja E. Lynge: Meeqqat pisinnaatitaaffii unioqqutinneqarput
Kommuneqarfik Sermersuumi aamma Kommuni Kujallarmi meqqanik sumiginnaanerannik qulaajakkat KNR-imit aasaq manna sammisarpagut.
Meeqqanillu sullissinermi sukaterisariaqarneq Kommuni Kujallermilu isumaginninnermi ataatsimiititaliameersup Karla Egede Bisgardip isumaqatigaa.
- Sutigut tamatigut meeqqanut inuusuttunnullu tunngasuni inatsisitigut sukaterusuttoqartariaqarpoq, kisiannili suliaq taama annertutigimmat piffissaqarfigerusupparput, Karla E. Bisgaard oqarpoq .
Tassami aamma inatsisissap piviusunngortinnissaanut kommunit ilinniarsimasunit sulisussanik amingaateqarput.
Taava aamma Inatsisissatut siunnersuutip isumaginninermut suliaqartunut kingunerissassai ilisimaneqanngitsut, kommuniniit tikkuarpaaat.
- Inatsississap tuaviupiluunneqarneratigut, suleqatigiittussat assigiinngitsut allaffeqarfinni annertoorujussuarmik suliaqarput, taakkununngalu suliassat qanoq kinguneqarnissaat inatsisissami takuneqarsinnaanngillat, Qeqqata kommunalbestyrelseani Ilaqutariinnermut Ataatsimiititaliami siulittaasoq Alfred Olsen oqarpoq.
Taamaammat Inatsissap atuutilinnginnerani peqqissaarunneqarnissaa pingaaruteqqarmat ataatsimiititaliarsuarmik pilersitsisisoqassasoq, kommuniit siunnersuutigaat.
