Marsip 12-iani qinersissaagut
Nunatsinni partiit immikkoortortoqarfiini ulluni tullerni ulapputtunnguussapput. Qinigassanngortitassanik sassartitsisoqareersimanngippat sassartitsisoqassaaq, allagartarsuit qineqqusaarutit naqiterneqassapput, timmisartumut umiarsuarmullu billetsinik inniminniisoqassaaq, qinigassanngortittut qinersisartunik ataatsimiisitsinerni peqataanissamut minnerunngitsumillu tusagassiuutini kukkullutik oqaaseqartuunnginnissaannut sungiusarneqassapput allarpassuarnillu piareersaateqartoqarluni.
Maannakkutut isikkoqartillugu, partiit Inatsisartuni ilaasortaatitaqartut qinigassanngortitsisinnaapput, taamatuttaarlu partii pilersinneqaqqammersoq, Partii Inuit. Naalakkersuisooqatigiit ingerlaannarsinnaassanersut imaluunniit Naalakkersuisut allanik taarserneqassanersut, qinersisartut marsip 12-iani aalajangissavaat, Nunatsinnilu politikerit qinigassanngortittullu isumalluartut taamanikkussamut naammattumik politikkilerinissartik naatsorsuutigisinnaavaat.
Qinersinissamut piareersaatit, qinersinertavia kingornalu naalakkersuisunngortitsiniarluni isumaqatigiinniarnerit KNR-imit malittarilluassavagut. TV-kkut, radiokkut knr.gl-ikkullu.
