Marluinnik qinigaaffeqarneq IA-kkormiup apeqquserpaa
Partii allamik isummereeraraluartoq Nuummi immikkoortoqarfimmi siulittaasoq Nikoline Ziemer allatut isummerpoq. Inuttaata oqarnera malillugu avissaartuunnissamik siunertaqanngilaq qinersisartulli martsip aqqaneq aappaani taasilerunik eqqarsaatersuutissarniassammata taama saqqummiussinerarpoq.
- Nuummi immikkoortoqarfimmiit inassutigaarput qinigaaffik ataasiinnaq sassarfigisariaqartoq. Takusinnaanngilara tamakkiisumik suliffiit marluk qanoq ililluni ataatsikkut ingerlanneqarsinnaanersut. Paasisinnaalluarpara partiip qullersaqarfia allamik isumaqarmat qujanartumilli IAp iluani isummat arlariit inissaqartinneqarput, Nikoline Ziemer KNR.gl-mut oqarpoq.
Uani oqaluuserineqartoq tassaavoq Folketingimut ilaasortap Sara Olsvigip inatsisartunut qinigassanngortinnera. Partiit allat aamma tamanna misilittagaqarfigaat. Uani qinigaaffimmi Doris Jakobsenip Siumumeersup misilissimavaa kommunalbestyrelsemi, inatsisartuni folketingimilu qinikkatut sulineq. Folketingimulli qinigaangami kommunalbestyrelsemiit tunuarpoq.
- Isumaga malillugu nunami maani inuit pikkorissorpassuit sulinissamut killilersorneqarput inuit ilaat pinngitsoorneqarsinnaanngitsutut misigimmata. Qinikkatut sulineq eqqarsaatigilluartariaqarpoq taamaasilluni pissaanerup eqiterutilinnginnissaa anguneqassammat. Taama pisoqarpat inuiaqatigiinnut iluaqutaanavianngilaq, Nikoline Ziemer oqarpoq.