Canadap issittortaani qimarnguiit ulikkaaqqasut
Covid-19-ip ingalassimatinneqarnissaanut malittarisassat USA-p Canadallu issittortaani innuttaasunit malinneqarnissaat ajornakusoorluinnarsinnaasoq, nittartakkami Arctic Todayimi allaaserineqarpoq.
Tamannalu arnarpassuarnut unammillernartoqarsinnaavoq.
Angerlarsimaannaqqusaasoqarnerata nalaani nakuuserniarnerit amerlisimapput, pingaartumillu arnanut persuttaanerit amerliartuinnavissimallutik.
Issittumi inoqutigiit angerlarsimaffimminni naammattumik inissaqarneq ajorput. Taamaattumik angerlarsimaffimmi matusimanissaq ajornakusoorsinnaasarpoq, aamma inunnut nakuusertartunut avissaaqqanissaq ajornakusoorsinnaasarpoq.
AAMMA ATUARUK Nunap inoqqaavisa Canadami qimarnguiit suli utaqqigaat
Canadap issittortaani coronavirusi pissutigalugu qimarnguiit ulikkaaqqapput, amerlanertigullu arnat meeqqallu toqqissisimaffigisinnaasaannik orniguffissaqarneq ajorlutik.
Arctic Today naapertorlugu Alaskami naggueqatigiit inuit indianerillu arnartaat 80 procentit sinnerlugit nakuuserfigineqarsimasut qimarnguimmiipput.
CNN-ip qanittukkut nalunaarutigaa, USA-mi angerlarsimaffinni nakuusernerit ajornartorsiutaanerulersimasut, nappaat pissutigalugu uippallernerit aningaasatigullu ajornartorsiornerit kingunerinik nakuusertoqarnerulersimavoq.
Nakuusernerit naliginnaanerusut pinnatik angerlarsimaffinni nakuusernerit amerleriarsimasut.
Angutillu nualiatik nappaammik tunillanniarsaralugit qisertarsimavaat. Tassa nappaatip alianartumik kingunerisa ilaat, New York citymi politiineersoq, Dermot Shea, CNN-imut oqaaseqarpoq.