Nunap inoqqaavisa Canadami qimarnguiit suli utaqqigaat
Nalunaarusiami 231-nik innersuussuteqarpoq, taakkunani inuiaqatigiinni naalakkersuisunilu iternga tikillugu allannguutissanik innersuussuteqarpoq.
Nalunaarusiami Reclaiming Power and Placemi tassa pissaaneq inissisimaffippullu utertissiummi nunaqarfinni illoqarfinnilu tamani qimarnguinnik ilaqutariinnut ataasiakkaanullu tapersiisinnaasunik immikkut ilisimasalinnik sulisoqartumik pilersitsisoqarnissaa innersuussutit ilagaat. Tamannali sivisussaaq akeqarlunilu aamma suli aallartisarneqanngilaq.
Taakku illoqarfinnut nunallu naalakkersuisunut oktobarimi qinersinermi pingaarnersiorneqassasut, Northwest Territoriesimi arnanut tunngasunut ministeri, Caroline Cochrane CBC Northimut oqarpoq.
Nalunaarusialli nunap inoqqaavisa arnartaat periarfeerunneqarsimanngikkunik toqutaasimasut pillugit ukkatarinnitsitsiniarnera pitsaasuuvoq.
AAMMA ATUARUK Canadami nunap inoqqaavinik toqoraasoqarsimavoq
USA-mi Canadamilu assingusumik misissuisoqarnikuunngilaq, USA-mili demokraatinit præsidentimut qinigassanngortittut, Elisabeth Warrenip Julian Castrollu qineqqusaarnerminni ajornartorsiutit taakku oqaluuserisalerpaat.
Nittartakkatigut saqqummersitsisartup, Think Progressip qineqqusaarutit allagartaat USA-mi nunap inoqqaavisa arnartaat 5712-it periarfeerunneqarsimaneranik takussutissiisut aamma takutippai.
Nalunaarusiaq Canadami illoqarfinni nunalu tamakkerlugu oktobarimut qineqqusaarnermi aamma pingaaruteqartorujussuuvoq.