Nalunaarusiaq nutaaq: Canadami nunap inoqqaavinik toqoraasoqarsimavoq
Nalunaarusiaq isertuussaq juunip ulluisa pingajuanni aatsaat saqqummiunneqartussaagaluarpoq, kopiiali tusagassiorfinnut tunniunneqarsimalluni.
- Arnat naggueqatigiit Inuit, indianerit metisillu tuusintilikkaat, suiaqatiminoortartut allallu periarfeerunneqartut toqorarneqarsimasulluunniit ilisimavarput, ataatsimiititaliarsuup nalunaarusiaani ilaatigut allassimasoq, CBC Newsip allaaseraa.
Canadami nunap inoqqaavini arnat periarfeerunneqarsimanngikkunik toqutaasimasut pillugit ataatsimiititaliarsuup sulinera ukiup pingajuata qeqqa sivisutigaaq.
Ataatsimiititaliarsuup nalunaarusiaa Ottawami pisortatigoortumik juunip ulluisa pingajuanni aatsaat saqqummiunneqartussaagaluarpoq.
Nalunaarusiaq juunip ulluisa pingajuata tungaanut isertuunneqartussaagaluarpoq, CBC Newsilli kopiia pissarsiarisimavaa.
Nunap inoqqaavisa arnartaat arnanut allanut naleqqiullugu persuttarneqarnerusartut aamma allassimavoq, nunasiaateqarnerup nalaanit mannamut persuttarneqartarlutik.
Ataatsimiititaliarsuup nalunaarusiaa Canadami naalakkersuisunut aqagu ataasinngornermi tunniunneqartussaavoq.