Canadami politiit nunap inoqqaavinut utoqqatsertut
Politiit nunallu inoqqaavisa akornanni pissutsit pitsaanerulissasut, Canadami politiit pisortaata Brenda Luckip Reginamut tunngatillugu tusarniaasoqarnerani oqaatigaa.
Nunap immikkoortuata Saskatchewap kujasissortaani tusarniaasoqarneranut atatillugu nunami politiit, aappaluttunik kavaajalittut imaluunniit politiitut hiistilisartartutut aamma ilisimaneqartut ilaqutariit taama amerlatigisut ilaquttaminnik annaasaqarsimanerat ajuusaarutiginerarpaat.
- Uanga nammineerlunga kattuffigalu sinnerlugu oqaatigissavara ilaquttassinnik asaqisassinnik annaasaqarsimanersi, tamatumalu kingorna anniaat ilissi ilaqutassilu misigisimasaat ajuusaarutigingaarakku, Brenda Lucki oqarpoq.
AAMMA ATUARUK Arnat periarfeerussat pillugit tusarniaasoqalersoq
Aammattaaq politiit pisariaqartitsisoqarnerpaaffimmi najuussimannginnerat utoqqatsissutigaa.
- Iliuuseqarnerusinnaagaluarluta maanna takusinnaavara, maannamiillu pitsaanerusumik suliniarluta neriorsuutigaara, Brenda Lucki oqarpoq.
Politiini suliat naggueqatigiinnut inunnut, indianerinut metisinullu arnanut tunngagaangata ilungersortumik tigullugit paasiniarneqarneq ajortut tusarniaanermi aalajangersumik oqaatigineqarpoq.
Nunap politiivi sulisuminut tamanut kulturikkut assigiinngissutsimik pikkorissaasarnermik pilersitsipput, taamaalilluni Canadami naggueqatigiit inuit paasilluarneqarsinnaalissallutik.
