Nive Nielsenip tv-kkut nangeqattaartuliami inuttaanissani nuannaarutigigaa
Tupaallanneq nuannaarujussuarnerlu.
Kalaaleq erinarsortartoq, Nive Nielsen, filmiliortartup Ridley Scottip TV-kkut nangeqattaartuliaani 'The Terror'-imi inuttassatut toqqarneqarami, taama qisuariarpoq.
- Misiliinerit arlalissuit peqataaffigaakka taamaattumillu aamma neriuutigisimallugu - imaluunniit neriuuteqarnissara qunugigaluarparaluunniit - kisianni sorunami iluatsissallugu neriuppunga. Taamaammat aamma assut nuannaarpunga, Nive Nielsen taama oqarpoq.
Nive Nielsen filmimi 'The New World'-imi, tusaamasarsuaq Colin Farrell inuttaaqatigalugu, aamma peqataallatsiarsimavoq.
Nive Nielsen nipilersoqatigisartakkanilu The Deer Children Europami tusarnaartitsisaqattaarnerminni inuttassatut toqqarneqarpoq, taamaammallu ulapissimaqaaq.
Aamma atuaruk Nive nunani tamalaani nangeqattaartuliami angisuumi inuttaalersoq
Isiginnaartitsisartulli pikkoreqimmata ilinniarfigilluarsimavai:
- Isiginnaartitsisartuupput pikkorissorsuit ilungersorlutillu sulisut, aamma ilinniarfigilluarsimallugit isumaqarpunga, aamma misigisaq nuanneqaaq, Nive Nielsen oqarpoq.
Erinarsortartup TV-kkut nangeqattaartuliamut peqataareernermi kingorna filmini allani inuttaanissani neriuutigaa, nipilersortartutulli nunani allani ilisimaneqarnerulernissani aamma neriuutigaa.
- Assut nuannissagaluarpoq. Aamma soorunami nipilersoqatigiinnut arlaatigut iluaqutaasinnaanissaa neriuutigaara, tv-kkut nangeqattaartuliap kingorna saqqumilaarnerulissagatta, Nive Nielsen taama oqarpoq.
Nipilersoqatigiit Nive and The Deer Children nipilersortartunut nersornaasiuttakkamik nersornaaserneqarnissaannik arlaleriarlutik piukkunneqarput, ilaatigut GAFFA-mit IMA-millu piukkunneqareerlutik.
