Frederik Elsner inersimasut qinngasaaruttarnerat pillugu erinarsuummik saqqummersitsisoq
- Qinngasaartissimagaanni assigiinngitsunit inuppassuarnit angerlarluni aatsaat qasunarsisarpoq, tassunga tunnganeruvoq tamakku eqqarsaatigivallaarnagit ingerlaqqinnissaq, Frederik Elsner taama oqarpoq.
Erinarsuut "Suli inuusoqigavit" pingasunngornermi decemberip 27-anni attaveqaqatigiittarfikkut Facebookikkut Youtubekkullu saqqummersinneqarpoq.
Frederik Elsnerip inuusuttuaraanermini Danmarkimi ilinniartilluni misigisani tunngavigalugit erinarsuut "Suli Inuusoqigavit" taalliaraa.
- Handelsskolemi atuarlunga qinngasaartittarnikuugama immaqa inuusuppallaariarama nipaallungalu, taava allatut isigineqarlunga taamaammat una misigisimavara annittariaqarlugu, Erinarsiortartoq taama oqarpoq.
Erinarsuutip musikvideoani oqaluttuarineqarpoq ilinniartitsisoq suleqatiminit atuartunillu nakkarsarneqartoq, kinaassutsinilu toqqorterniarlugu akuerineqarnissarlu anguniarlugu iliuuserisai takutinneqarput.
AAMMA ATUARUK Kalaallit Danmarkimiittut meerartaat qinngasaarneqartarneri iliuuseqarfigineqarli
Frederik Elsnerip nipilersortartutut atuarfiit, utoqqaat illui suliffeqarfiillu allat appisimaarfigisarpai. Tassani inersimasut akornanni aamma nakkarsaasoqartartoq maluginiarsimavaa.
- Inersimasuni malugisarnikuuara qinngasaarisarnerit sakkortulaarsinnaasut, ilaasalu sakkortuumik itisuumillu tigusarpaat, taava malugisinnaallugu arlaannik allanngueqataarusullunga, Erinarsortartoq KNR-imut taama oqarpoq.
AAMMA ATUARUK Nakkarsaaneq sakkortuuumik sunniuteqartarpoq
Nakkarsaasarnermut pinaveersaartitsinerit meeqqanut kisimi atuutsinneqassanngitsut, Frederik Elsner isumaqarpoq.
- Takusarpara meeqqanut qinngasaarisarnerit kampagneqartartut kisianni aamma isumaqarpunga inuusuttuaqqanut inersimasunullu sanasoqartariaqartoq, Erinarsortartoq Frederik Elsner KNR-imut taama oqarpoq.