NEQEROORTITSINEQ Sermersooq neqeroortitsilertorpoq

Pisiniartarnermik immikkoortut aqqanillit upernaap ingerlanerani neqerooruteqartitsissutigineqassasut Kommuneqarfik Sermersuup pilersaarutigaa, taamaalinikkut millionilikkuutaanik sipaarniassagamik.

Allattoq Jonas Fievé

februaarip 22-at 2016 10:28

Nutserisoq Mads Lynge

- Kalaallit Nunaannili Sulisitsisut assersuutigalugu kommunip paaqqinnittarfinnut, nerisassanut nangernullu 7 millionit koruunit nalinginut pisiniutissanik neqerooruteqartitsisoqarsimannginneranut isornartorsiuinerannut tamanna qisuariaataanngitsoq, Kommuneqarfik Sermersuup pisiniartarnermut pisortaa Gerth Jakobsen oqarpoq:

- Taama oqartoqarsinnaanngilaq. Aamma soorlu paasineqarsinnaassasoq ullualunnguit ingerlaneranni isornartuisoqarnera pissutaalluni taava tassanngaannaq piareersimariataarluta, niorarfissat qulit assigiinngitsut misissoqqissaareerlugit avammut neqeroorutigisinnaalissallugit. Taamaattoqanngilaq. Tassa suliaq 2014-mi ukiaaneranili aallartinnikoq, massakkut ima killiffeqarpoq, tassa piareersimalerpugut suliarinnittussarsiornissamut, Kommuneqarfik Sermersuumi pisiniartarnermut pisortaq Gerth Jakobsen KNR-imut taama oqarpoq.

Aamma atuaruk Sermersooq kommuninik nakkutilliisoqarfimmut GE-p suliassanngortinniaraa

Neqerooruteqartitsissutaasinnaasut kisiisa neqerooruteqartitsissutaassasut, imminullu akilersinnaasut kisiisa matumani eqqarsaatigineqartut taassuma erseqqissaatigaa:

- Imminut akilersinnaasutut imaluunniit angusaqarfiusinnaasut aningaasatigut taakkua suliarinnittussarsiorneqalissapput avataani. Tassa avammut neqeroortussarsiuinnarnavianngilagut, nalileeqqaartarpugut ilumut imminut akilersinnaassanersoq, sullissinikkut pitsaanerusumik angusaqarsinnaanerluta. Taavalu aamma aningaasaqarnikkut akikinnermik Ingerlatitsissinnaalissanerluta.

Neqeroortussarsiorneq siunertaralugu misissueqqissaartoqassagaluarpat naatsorsuuserisunut, taava millionip affaata missaanik tamanna akeqarnissaa naatsorsuutigineqarnikuusoq Gerth Jakobsenip oqaatigaa.

Immikkoortulli assigiinngitsut siunissami neqerooruteqartitsissutigineqassanersut taassuma oqaatigisinnaannginnerarpaa, naliliinikkut tamanna pisassasoq oqaatigalugu:

Aamma atuaruk NEQEROORTITSINEQ Paaqqinniffiit pisiniartarfissaannut neqeroortitsisoqanngilaq

- Maannangaaq naaggaarlungalu angersinnaanngilanga. Naliliineq apeqqutaajuaannassaaq. Pisiniartarpugut nioqqutissanik assigiinngitsorpassuarnik Kommuneqarfik Sermersooq tamaat isigalugu. Tamatigullu naliliinerup takutissavaa angusaqarfiussanersoq avammut neqeroorfissarsiorneq, tassa aningaasatigut akikinnermik ingerlatsineq ingerlalersinnaassanersoq, taavalu ajunnginnerusumik Kommuneqarfik Sermersooq sullinneqarsinnaassanersoq. Naliliineq tunngaviuaannassaaq, Kommuneqarfik Sermersuumi pisiniartarnermut pisortaq Gerth Jakobsen taama oqarpoq.