NEQEROORTITSINEQ Paaqqinniffiit pisiniartarfissaannut neqeroortitsisoqanngilaq
- Arctic Importip toqqarneranut peqqutaavoq, taanna pisiortorfigisartakkatsinni annerusunut ilaammat, Kommuneqarfik Sermersuumi aningaasaqarnermut pisortaq Lars Møller-Sørensen oqarpoq.
Paaqqinniffiit namminneq aalajangertaraluarpaat
Paaqqinniffiit pisortaat nanginik nerisassanillu sumi niuerusunnerlutik nammineq siullermik aalajanngertaraluarpaat. Nioqqutissat pisariaqartitaat Arctic Importimiit maannakkut eqqunneqartalerput:
- Assersuutigalugu meeqqat nerisassaat, pinnguarluni atortussat, nerriveeqqat, issiaveeqqat ilaalu ilanngullugit. Paaqqinniffiummi pisiarisartagai amerlaqaat.
Isumaqatigiinnerlumi taxanut akiligassarpassuusarsimasunik kommunemut sipaaruteqartitsissaaq:
- Takusartagarput tassaavoq, immuk Brugsenimi Pisiffimmiluunniit akikinnerunersoq, paaqqinniffinni misissuataarneqartartoq, taavalu immuk akikinnerpaaq pisiariartorlugu siumut utimullu taxartarlutik, aningaasqarnermi pisortaq opqarpoq.
Isumaqatigiissuteqarnikkulli tamannalu taamaatinneqassaaq.
Sipaaruteqarnerujussuarmik kinguneqassaaq
Artic Importimut isumaqatigiissuteqarneq paaqqinniffinnut siuliinut sanilliullugu sipaaruteqarnerujussuarmik kinguneqassasoq, Aningaasaqarnermut pisortap Lars Møller-Sørensenip erseqqissarpaa:
- Pisiarineqartartut asserluinnaannik pisinermi 20-t 25 procentillu akornanni sipaaruteqarneruvoq. Tassalu paaqqinnittarfinni 7 million koruunit niuernissamut atugassatut missingersuutini aningaasarpaaluupput.
Taamaaliornikkut akileraarutissat qaffanneqanngitsoornerartigut innuttaasut iluaqutigingaassavaat.
Kommunilli niuernissamik isumaqatigiissuteqarnikkut akileraarutinik ilumut aappaasinnaanera qulakkiinngilaa. Arctic Importimummi isumaqatigiissuteqarneq sioqqullugu neqerooruteqartussarsiorsimanngitsoq, Lars Møller-Sørensenip nassuerutigaa:
- Ilumoorporluinnarpoq meeqqeriviit pisiortortarnerat pillugu Arctic Importimik isumaqatigiissusiorneq sioqqullugu neqeroortussarsioqqaannginnnatta.
Ilumoorpoq akikinnerusinnaanersoq nalugatsigu.
Allanik neqeroortoqarsinnaaqqullugu piffissamimi tassani kommuni neqeroortitsisinnaasimanngitsoq, aningaasaqarnermut pisortap Lars Møller-Sørensenip oqaatigaa.