NEQEROORTITSINEQ Sermersooq kommuninik nakkutilliisoqarfimmut GE-p suliassanngortinniaraa
Inatsisinik unioqqutitsineruvoq, Kalaallit Nunaanni sulisitsisuni allattoqarfimmi pisortaq, Karsten Lyberth Klausen, isumaqarpoq, Kommuneqarfillu Sermersooq Kommuninik nakkutilliisoqarfimmut tunniunniarpaa.
- Isumaqatiissuteqarnissaq uani ajornartorsiutaanerpaanngilaq. Isumaqaannarpugut allanut neqoroorutigineqartariaqartoq. Tassa akikinnerpaaq piniarlugu tamattami akileraarutinut akiliutigisagut atorluarniassagatsigit, Karsten Lyberth Klausen GE-meersoq oqarpoq.
Kommuneqarfik Sermersuumi aningaasaqarnermut pisortap Lars Møller-Sørensenip kommunip paaqqinniffiinut tamanut nioqqutissanik pisiortornissamut suliassaq 7 millionit koruunit missaannik naleqartumik, neerooruteqartoqartissimannginnera ippassaq oqaatigaa.
Aamma atuaruk NEQEROORTITSINEQ Paaqqinniffiit pisiniartarfissaannut neqeroortitsisoqanngilaq
- Ilumoorluinnarpoq meeqqeriviit pisiortortarnerat pillugu Arctic Importimik isumaqatigiissusiorneq sioqqullugu neqeroortussarsiortoqanngimmat, Kommuneqarfik Sermersuumi aningaasaqarnermut pisortaq, Lars Møller-Sørensen, oqarpoq.
Kommunillu suliassaq tamaat Arctic Importimuinnaq suliassanngortippaa.
Kisianni taava akikinnerusinnaanersoq nalugaat KNR-imiit tikkuarparput.
- Tamanna ilumoorluinnarpoq. Aaqqinitsinni akikinnerusoqarsinnaanersoq ilisimasinnaanngilarput, Lars Møller-Sørensen oqarpoq.
Tamannali ajorpoq, Karsten Lyberth Klausen, GE-meersoq, kommunimik Kommuninik nakkutilliisoqarfimmut tunniusisoq, isumaqarpoq.
- Taama iliorsimaneq malittarisassanik malinninnerunersoq Kommuninik nakkutilliisoqarfimmut misissortinniarparput, Karsten Lyberth Klausen oqarpoq.
- Taamaaliukutsoorniarlik. Ajunngitsumik iliorpugut. Tupaallaatigissavaralu allatut kinguneqartinneqassappat, Kommuneqarfik Sermersuumi aningaasaqarnermut pisortaq, Lars Møller-Sørensen, oqarpoq.