Kim Kielsen: Eqqartuussissuserisut naliliinerat naammappoq
Kukkunersiuinermut ataatsimiititaliap Kim Kielsen nipisattassiissutinik qaffaaqataanermini attuumassuteqarpallaarnersoq pillugu suliaq aasaq misissuiffigilerpaa.
Misissuinerminiillu nassuiaammini Kim Kielsen sakkortuumik isornartorsiorpaa. Kielsenip paasissutissat piumasarineqartut tamaasa tunniussimanngikkai ilaatigut isornartorsiuutigineqarpoq.
Eqqartuussissuserisoqarfiup Poul Schmithikkut suliakkinneqarnerata oqaasertaliussaa ataasimiititaliap pissarsiarerusukkaluarpai. Aamma sulinermut allakkanik pissarsisimanngilaq.
AAMMA ATUARUK Kim Kielsen sakkortuumik isornartorsiorneqarnerminut akissuteqarpoq: Tusaatissatut tiguneqarpoq
Naalakkersuisulli siulittaasuata naalakkersuisoqarfia naapertorlugu ataatsimiitsitaliaq piumasaqaatigisinnaasaminit paasissutissinneqarneruvoq.
Eqqartuussissuserisoqarfiup Poul Schmithikkut naliliinerat tamaat nipisattassiissutinullu tunngatillugu naalakkersuisut isummernissaannut tunngavissiaq ataatsimiititaliamut tunniunneqarsimasut, naalakkersuisoqarfik allappoq.
Kim Kielsenillu isummernissamut tunngavissiaq tunniuttariaqarsimanngikkaa naalakkersuisoqarfik allappoq.
- Isummernissamut tunngavissiap tunniunnerani Naalakkersuisut Siulittaasuata Naalakkersuisoqarfianit erseqqissarneqarpoq isummernissamut tunngavissiap tunniunneqarnissaanut Kukkunersiuinermut Ataatsimiititaliaq piumasaqarsinnaanngitsoq, tamannalu pissutigalugu isummernissamut tunngavissiaq "isertugassatut" naqissuserneqarsimavoq, Kukkunersiuinermullu Ataatsimiititaliap ilaasortaanuinnaq tunniunneqartussaalluni.
Akissutit naammapput
Kim Kielsenip ataatsimiititaliamit apeqquteqaatit tamaasa akisimagai aamma allaqqavoq.
Ataatsimiititaliarli suliffeqarfiup iluani sulinermut allagaatinik eqqartuussissuserisoqarfimmillu allaqateqarnermit allakkanik tunineqanngilat. Taakku marluk suliamut takunnissinnaatitaanermut ilaanngitsut, naalakkersuisoqarfik allappoq.
Eqqartuussissuserisoq qanoqqissaaq suliakkerneqarsimanersoq, sumillu tunngaveqarluni inerniliisimanersoq ataatsimiititaliap paaserusukkaluarpaa.
Eqqartuussissuserisoqarfiulli naliliinera naammattoq, Kim Kielsen isumaqarpoq.
- Paasissutissat suliamut attuumassuteqartut tamarmik misissuinermi erseqqissumik takuneqarsinnaapput.
AAMMA ATUARUK Tusagassiorfik: Kim Kielsenip angallataa inuussutissarsiutigalugu aalisarnermut akuersissuteqanngilaq
Inatsisartut paasissutissinneqarnissamut periarfissaat pisinnaatitaaffiilu nalornissutigineqarsinnaasut Inatsisartut siulittaasoqarfiat Naalakkersuisullu siulittaasuata naalakkersuisoqarfia allapput.
Inatsisilerinermut immikkoortortaqarfimmi atilittanik aamma inatsisut allattoqarfiani inatsisilerituumik, inatsisinut atuuttunut nassuiaammik suliaqartinneqartartussanik piaartumik pilersitsisoqassasoq Kim Kielsenip siunnersuutigaa.