Tusagassiorfik: Kim Kielsenip angallataa inuussutissarsiutigalugu aalisarnermut akuersissuteqanngilaq
![](/sites/default/files/styles/image_934x467/public/article_images/qineqqusaajaarneq_amp.00_02_53_04.still001.jpg?itok=y4wr3sY5)
Kim Kielsenip (S) angallatiminik nipisanniamut attartortitsisimasoq paasineqarmat tamannalu oqallisigineqartorujussuanngorpoq, inuttaami nipisattassat amerlineqarnissaannik tamanna sioqqullugu aalajangeeqataanikuummat.
Kielsenip angallataa inuussutissarsiutigalugu aalisarnermut akuersissuteqanngitsoq maanna tusarliunneqarpoq.
AAMMA ATUARUK Eqqartuussissuserisoqarfik uppernarsaasoq: Kielsen akuliuttussaanngissimanersoq misissoraa
Sermitsiaq.AG tamanna pillugu paasissutissanik Imarsiornermik Aqutsisoqarfimmit pissarsisimasoq taama allappoq.
Imaani Isumannaallisaaneq pillugu Inatsit naapertorlugu unioqqutitsisoqarsimatillugu suliaqarnermi pineqaatissiissutaasinnaasunik assigiinngitsunik tunniussisoqarsinnaasoq, tassunga ilanngullugu angallat arsaarinnissutaasinnaasoq akiligassiisoqarsinnaalluniluuunniit, Imarsiornermut Aqutsisoqarfiup Sermitsiaq.AG-mut ilisimatitsissutigaa.
Kim Kielsen nipisattassat amerlineqarnerannut ataasiaannarani attuumassuteqarpallaannginnerarnikuuvoq. KNR-imit Qanooruumi toqqaannartumik apersorneqarami tamanna aamma oqaatigaa.
Kukkunersiunermut Ataatsimiititaliap danskillu eqqartuussissuserisut Poul Schmithimeersut Kim Kielsen attuumassuteqarpallaarsimanersoq misissuleruttorpaat.