Kim Kielsen sakkortuumik isornartorsiorneqarnerminut akissuteqarpoq: Tusaatissatut tiguneqarpoq

Naalakkersuisut siulittaasuata Kukkunersiuinermut ataatsimiititaliap sakkortuumik isornartorsiuineranut qisuariaateqartitsiniarneq ataasinngormalli iluatsissimanngilaq. Kielsenili maanna qisuariaateqarpoq.
- Kukkunersiuinermut ataatsimiititaliap nassuiaataa, ataatsimiititaliap nassuiaataani isornartorsiutit ilanngullugit, tusaatissatut tiguakka, Kim Kielsen KNR-imut malikkut oqarpoq. Assi © : KNR
septembarip 10-at 2020 12:00

isornartorsiuineq tusaatissatut tiguneqarpoq.

Naalakkersuisut siulittaasuat, Kim Kielsen Inatsisartut kukkunersiuinermut ataatsimiititaliaanit sakkortuumik isornartorsiuisoqarneranut naatsumik ersarissumillu taama akissuteqarpoq.

- Kukkunersiuinermut ataatsimiititaliap nassuiaataa, ataatsimiititaliap nassuiaataani isornartorsiutit ilanngullugit, tusaatissatut tiguakka, Kim Kielsen KNR-imut malikkut oqarpoq.

Taanna nipisannik aalisartumut umiatsiaminik atukkiussaqaatigaluni nipisattassiissutinik qaffaaqataanermini attuumassuteqarpallaarsimanersoq attuumassuteqarpallaarsimannginnersorluunniit kukkunersiuinermut ataatsimiititaliamit misissorneqarpoq.

AAMMA ATUARUK Kukkunersiuinermut ataatsimiititaliaq Kielsenip iliuusaanut sakkortuumik uparuaasoq

Kukkunersiuinermut ataatsimiititaliap nassuiaatini ataasinngormat saqqummiuppaa, tassanilu Kim Kielsen sakkortuumik isornartorsiorneqarpoq.

- Kim Kielsenip attuumassuteqarpallaarsinnaanermut apeqqummik eqqumaffiginnissimannginnera ataatsimiititaliap sakkortuumik uparuarpaa tamannalu Inatsisartunut immikkut maluginiaqqullugu, ataatsimiititaliaq nassuiaammini allappoq.

Tamannalu ataatsimiititaliap isornartunut oqaaseqaatigisinnaasaani sakkortunerpaavoq.

Kim Kielsenilli apeqqut eqqumaffigisimallugu erseqqissaarusuppaa attuumassuteqarpallaarnanili nammineq nalilersimallugu.

Tamannali Naalakkersuisunut ilaasortanut allanut kalerriutiginngilaa, taamaaliorsimannginninilu ajuusaarutigalugu, akissummini allappoq.

Assigiinngitsunik isornartorsiuisoqartoq

Suliami Naalakkersuisunik suleqateqarneq ilungersunarsimasoq kukkunersiuinermut ataatsimiititaliap siulittaasua, Kim Kielsenillu parteeqataa, Erik Jensen, KNR-imut siusinnerusukkut oqarpoq.

Illuatungiliuttuninngaanniit Inuit Ataqatigiit siulittaasuata, Múte B. Egedep, suliaq ilungersunartorujussuartut kinguneqartariaqartutullu nalilerpaa.

AAMMA ATUARUK Erik Jensen nipisattassiissutit pillugit: Naalakkersuisut ilungersunarput

Naalakkersuisoqatigiinniittut Demokraatit Kim Kielsenimik uppititserusunngitsut, partiip siulittaasua Jens-Frederik Nielsen oqareerpoq.

Demokraatit isornartorsiuisoqarnera tusaatissatut tigugaat siulittaasup oqaatigaa.

Kim Kielsen KNR-imit apersorniaraluarparput, ullunili makkunani Nuummiinnginnami apersorneqarsinnaanngitsoq, naalakkersuisoqarfiata allattoqarfianit nalunaarput.