Air Greenlandip Pituffik atorusukkaa

Timmisartummi Qaanaamut missinnaanngikkaangamik Upernavimmut ullumikkut utertariaqartarput, tamannalu unammillernarsinnaasarpoq.  

- Taamaalilluta orsussamik annertuumik nassartariaqartarpugut. Tamannalu siullertut ilaasussat amerlassusaannut sunniuteqartarpoq, aappaattullu Upernavik silarlukkajuttuulluni, Air Greenlandip pisortaanera Jacob Nitter Sørensen KNR-imut oqarpoq.

AAMMA ATUARUK Kangerlussuarmi annikillisaanissaq pisortaanerup mianersoqqussutigigaa

Silasiortut pisinnaasunut tamanut sillimaniartut

Upernavillu periarfissat aappaattut miffissatut aamma atorneqartarmat, pujorpallaarnera imaluunniit atsissunik nuiaqarnera pissutigalugu uterfigineqarsinnaanera minnerpaamilluunniit nalorninaateqarpat Air Greenlandip timmisartuutai aallaqqusaaneq-ajorput.   

Illoqarfiullu Qimusseriarsuarmut sammiveqarnermigut silarlukkajuttarnera pissutigalugu, silasiortut silamik ilimasaarusioraangamik pisinnaasunut tamanut sillimaniartarput.

- Inatsisimmi naapertorlugit Upernavimmi Qaanaamilu silagikkaluartoq aallarsinnaaneq-ajorpugut, silamik ilimasaarutaasut naapertorlugit aallaqqusaannginnatta, pisortaaneq oqarpoq.

Qaanaamulli timmisartuussisarnerni Pituffimmi sakkutooqarfik periarfissat aappaattut miffigisinnaasatut atorsinnaasuugaanni, timmisartut amerlanerusunik ilaasoqarsinnaassagaluarput, Upernaviup uterfiginissaanut orsussaq naammattoq pisariaarutissammat.

AAMMA ATUARUK Qaanaaq takornarianit ornigineqanngilaq

Taamaatitsisarnerit ikinnerulissasut

Aamma timmisartuussinissamik taamaatitsinerit ikinnerulissagaluarput, Upernavimmi silagittariaqarnera apeqqutaajunnaassammat.

- Aamma Qaanaamut timmisartuussinerit taamaatinneqartariaqartarnerat ajornartorsiutinik pilersitsisarput, timmisartuussinerit ikitsuinnaanerat Qaanaallu ungasiarnera annertuumik pisariaqartitsiffiusarmat. Angummanniarlutami timmisartoq inuttallu ulloq ilivitsoq tamatumunnga atortariaqartaratsigit, Jacob Nitter Sørensen oqarpoq.

Air Greenlandilli pisortaanerata oqaatigaa oqartussat susassaqartut attaveqarfigereersimagitik, tamatumalu siunissami qaninnermi iluatsissinnaanissaa ilimaginagu. Amerikamiummi sakkutooqarfigivaat kikkullu Pituffimmiissinnaanerannut malittarisassat sukannersuullutik.

Air Greenlandilli timmisartuutai ajornartoorfimmi sakkutooqarfimmut missinnaatitaasut, timmisartortitseqatigiiffimmi pisortaaneq erseqqissaavoq.