Qaanaaq takornarianit ornigineqanngilaq
Ukiualuit siulianut sanilliullugu takornariaqarneq maanna annikitsuinnaavoq. Allaat 75 procentingajammik appaariaateqarsimasoq, Hans Jensenip oqaatigaa. Taassuma nuliatalu nunatta illoqarfiisa avannarlersaanni Hotel Qaanaaq 1972-miilli ingerlassimavaat.
Massakkulli ima ajortigaaq takornariat timmisartukkut tikittartut assaannarmik allaat kisinneqarsinnaallutik, taanna oqarpoq.
- Tikittut 15-it 20-llu akornanni taamaallaat amerlassuseqarsimapput. Ilai Schweizimeersuupput, Spaniameersuullutik kiisalu Tysklandimeersuulluutik.
Sumilliuna takornariat tikittartut 75 procentimik appariaateqarnerat pissuteqartoq?
Aap, eqqumiikkaluartumik mittarfik nutaaq ukiut tuusintilikkaat nutaat aallartilaarnerani atoqqaarfissiorneqartoq pisuutinneqarpoq:
- Siullermik maanga angalaneq akisoorujussuuvoq. Mittarfittaarnitta kingorna akit marloriaammik qaffasimapput tamatuma kinguneraa takornarit allamukartalernerat, Hans Jensen oqarpoq.
Taamaattumik taassuma siunnersuutigaa, timmisartumut ilaanermut akigititat appartinneqassasut, pisisussat takornariaagaangata. Assersuutigalugu takornariat Qaanaamukartussat timmisartumi inissaqaraangat affaannarmik akiliillutik ilaasinnaapput, taanna oqarpoq.
Taamaalillutik timmisartumik tikittartut, kisannimi aamma illoqarfimmut umiarsuarnik takornariartaatinik tikittoqartaraluarpoq - ukioq manna pingasut - aningaasanik atuisarnerat annikitsuinnaavoq.
- Sivikitsuaqqamik maaniittarput - amerlanertigut ullup affaani - pisiaqarpiarnerlu ajorlutik, tassa neqeroorutigisinnaasaraluagut, assersuutigalugu aarrit qilalukkallu tuugaavi nunatsinniit annissinnaannginnamikkit. Taamaattuminguna umiarsuit angisuut tikikkaangata illoqarfiup tungaaniit piareersimanissaq pisariaqartoq:
- Illoqarfimmi peqatigiiffiit erinarsoqatigiinnik imaluunnit qilaatersortunik akilerneqarlutik takutitsisinnaapput imaluunnit arnat peqatigiifffiat kalaallisut kaffillernermik aaqqissuussisinaavoq, Hans Jensen siunnersuivoq.
Sunaluunniit patsisaagaluarpat Qaanaamut takornarianik amerlanerusunik tikittoqartannginnera uggornartuuvoq, tassami Hans Jensenip oqarneratuulli sumiiffik allanik asseqanngitsunik neqerooruteqarsinnaagaluarmat.
- Maannakkumi Kalaallit Nunaanni qangatut qimussernermik qilalugarniarnermillu kisiartaalluta ingerlatsisuuvugut, taamaattumilluuna tamatuma immikkuullarissumik inissisimatikkaatigut, Hans Jensen oqarpoq.
Taassuma ilanngullugu siunnersuutigaa takornarianik qimussimik angallassineq qanoq pitsaanerusumik ingerlanneqarsinnaanersoq pillugu piniartunik suli annertunerusumik ilinniartitsisoqarnissaa, Nunatsinni Takornariaqarnermi Inuussutissarsiornermilu Siunnersuisoqatigiinnit isiginiarnerusariaqartoq.
