Nunatta Eqqartuussisuuneqarfia: Angut ukiuni marlunni pinerluuteqarsimasunut inissiisarfimmiitinneqassaaq
Angut 50-it naajartorneranni ukiulik illooqqami panianik ukiuni 14-ini kinguaassiutitigut atornerluisarsimanini pissutigalugu ukiuni marlunni pinerluuteqarsimasunut inissiisarfimmiittussanngortinneqarpoq.
Nunatta Eqqartuussisuuneqarfiata tamanna aalajangerpaa.
Naapertuilluanngitsuliornerit niviarsiaqqap maanna eqqartuunneqarsimasumi najugaqarnerani tassa 2002-mit 2016-imut pisarsimapput. Niviarsiaraq 1990-imi inunngorpoq, taamaammat niviarsiaqqap aqqaneq-marlunnik ukioqarneranit naapertuilluanngitsuliornerit aallartipput 26-nillu ukioqartoq unillutik.
AAMMA ATUARUK Tasiilami suliat Nunatta Eqqartuussisuuneqarfianit aalajangiiffigineqartut
Angut naapertuilluanngitsuliortarnermini nakuuserniartarsimanngilaq, angulli pineqartoq niviarsiaqqamut siusinnerusukkut nakuuserniartarsimavoq, puffarissutullu aamma oqaatigineqartareerluni.
Angut ersigisarsimallugu niviarsiaqqap oqaatigaa, Nunatta Eqqartuussisuuneqarfiatalu pineqaatissiiniarnermini tamanna isiginiarsimavaa.
Niviarsiaqqap angummit ukiorpassuarni atornerlunneqartarsimanini nalunaarutigisimavaa.
Angut pineqaatissinneqarsimasunut ukiuni marlunni inissiisarfimmiittussanngortinneqarnermi saniatigut niviarsiaqqamut 75.000 koruuninik taarsiisussanngortinnneqarpoq.
AAMMA ATUARUK Tasiilami meeqqanut inuusuttunullu kinguaassiutitigut pinerlinnerit pillugit unnerluutiginninnerpassuit
Angutip Nunatta Eqqartuussisuuneqarfianit pineqaatissinneqarnera Qaasuitsup Eqqartuussisoqarfiata ukioq manna apriilimi pineqaatissiineranut assinguvoq, tamannalu angutip Nunatta Eqqartuussisuuneqarfianut taamanikkut suliareqqitassanngortippaa.
Unnerluusisussaatitaasup Ilulissanut Aasiannullu sapaatit-akunnera 43-mi angalanerani pineqaatissiisoqarpoq. Nunatta Eqqartuussisuuneqarfianut suliareqqitassanngortitat arlallit tassani aalajangiiffigineqarput.
Nunatta Eqqartuussisuuneqarfianut suliareqqitassanngortitat taakku nakuusersimanermut kinguaassiutitigullu atornerluisimanermut atatillugu pineqaatissiinernut aamma tunngapput.