Tasiilami suliat Nunatta Eqqartuussisuuneqarfianit aalajangiiffigineqartut

Kalaallit Nunaata politiivisa unnerluussisussaatitaasui ukiukitsunut kinguaassiuutitigut pinerlunnermut taavalu persuttaanermut eqqartuussinernik suliareqqitassanngortinneqarsimasunik suliaqariartorlutik ungasinngitsukkut Tasiilamiipput.

Nunatta Eqqartuussisuuneqarfiani Tasiilamit nunaqarfiiniillu suliat arfinillit oktobarip ulluisa 17-iannit 19-iannut suliarineqarput. Taakkunanngaanniillu marluk politiit tusagassiuutinut nalunaarumminni immikkut allaaseraat.

Angut 31-nik ukiulik niviarsiaqqamik 13-inik ukiulimmik pinngitsaaliisimasutut ukiuni marlunni qaammatinilu arfinilinni pineqaatissinneqarsimasoq pillugu suliaq taakkununnga ilaavoq.

Angutip niviarsiaraq pinngitsaalillugu sinittarfiliaateriarlugu pinngitsaalivaa.

Eqqartuussut najukkami eqqartuussiviup ukiumi ataatsimi qaammatinilu qulingiluani pineqaatissiissutaanik sakkortunerulersitsineruvoq.

Pinngitsaaliisup niviarsiaqqallu 13-inik ukiullip ukiuisa nikinganerat Nunatta Eqqartuussisuuneqarfianit pingaarnertut tunngavilersuutigineqarpoq.

Pinngitsaaliisoq niviarsiaqqamut 80.000 koruuninik aamma taarsiissuteqassaaq.

Suliami allami angut 30-nik ukiulik niviarsiaqqamik 13-inik ukiulimmik pingasoriarluni atoqateqarsimasutut niviarsiaqqallu 14-inik ukiullip iviangiinik attuuannissimasutut qaammatini pingasuni pineqaatissinneqarpoq.

Suliani marlunni pineqatissiinerit assigiinnginnerat suliami siullermi angutip pinngitsaaliineranik pissuteqarpoq.