Video: Målmand ulikaatigaluni isertitsisoq
Siornatigut takuneqartareerpoq illup iluani arsaannermi målmandit isertitsisut. Qaqutigorujussuarli periutsit nalunarluinnartut soorlu ulikariaatigaluni isertitseriarnerit atorlugit isertitseriartoqartarnera.
Taamatorpiarlu pisoqarpoq Aasianni sapaatip akunnerani kingullermi anngunniuttoqarmat. Nagdlúnguup målmandia Henning Wind saassusseqataasoq qutsiakkut tunineqarpoq, taanna naliginnaasumik isimmissallugu niaqormissalluguluunniit qutsippallaarpoq.
Henning Wing anngunniunnermi isertitsisoq
Taavami qanoq iliortoqarsinnaava. Aap, eqaalluinnaraanni ulikariaatigaluni isertitseriartoqarsinnaavoq. Henning Windillu ima torrallatsigaa unammisaminnut isertitsinermik kinguneqarluni.
Anngunniunnertaqanngitsut
Nagdlúnguak Aasianni anngunniuttoqarnerani aamma arsarluarpoq anngunniunnermi ajugaasuulluni. Avannaaniit annguttut iligiit allat tassaatput G-44 Qeqertarsuarmit aamma T-41 Aasiannit.
Qeqqani anngunniuttoqarmat tamanna Maniitsumi naammassineqarpoq.
Unammersuarnerit Sisimiuni naggataarneqarnissaannut iligiit pingasut Nuummeersut annguttuupput. Taakku tassaapput B-67, IT-79 aamma Young Guns.
Iligiit kujataaniit nalunaartut anngunniunnertaqanngitsumik anngupput. Taakku tassaapput Siuteroq 43 Nanortalimmiit aamma K-33 Qaqortumeersoq.
Tunumi aamma anngunniuttoqanngilaq. Tunumiit ATA Tasiilameersoq peqataasussanngorpoq. Unammersuarnernik aaqqissuisut SAK Sisimiuneersut toqqaannartumik anngupput unammersuarnerilu apriilip naaneraniit KNR-TV-mi toqqaannartumik aallakaatinneqassapput.
