Mallorcami neriniartarfiit ilaata qaava nakkaammat ajunaartoqarlunilu ajoquserujussuartoqartoq
Spaniamiut qeqertaataanni takornarianit ornigarneqarluartartumi Mallorcami neriniartarfiup qaava sisamanngornermi unnukkut nakkaammat, inuit sisamanit ikinnerunngitsut ajunaarput.
Inuit 16-it ajoquserujussuarsimapput.
Takornarianik ornigarneqarluartartumi Playa de Palmami ajunaarneq pivoq.
Neriniartarfiup tusaamaneqartup Medusa Beach Clubip qaliaa nakkaassimasoq, isiginnittut oqaluttuarput.
Mallorcami ambulancit atorneqarsinnaasut tamarmik sisamanngornermi unnukkut arfineq-pingasut missaanni aggersarneqarput, taamatullu isumannaallisaasut poltiillu takkullutik.
Arnaq kalaaleq: Suna tamarmi nipaaruppoq
Arnaq kalaaleq Kirstine Olsenimik atilik ajanilu Mallorcami feeriartoq Danmarkimi aviisi BT-mit oqaloqatigineqarpoq.
Ajanilu sissameereerlutik akunnittarfigisaminnukaramik politiinik, qatserisartunik ambulancinillu ujameriattoq takuleritsik, Kirstine Olsen BT-mut oqarpoq.
- Inuppassuaqarpoq, taakkua tikkuinnarlutik quarsaarpasipput. Suna tamarmi nipaaruppoq. Neriniartarfik taanna taama pisoqarnissaanut minutsit 30-t missaat sioqqullugit saneqqukkatsigu ippinnartoqanngilaq, Kirstine Olsen oqarpoq.
- Ajunaaqataasimasinnaagaluarpugut, ajunaarfillu taama qanitsigalugu amiilaarnavippoq, taanna oqarpoq.
Neriniartarfiup qaliaata nakkaaneranit eqqugaasut qarmakut suli akornanniissangatinneqartut, nutaarsiassaqartitsivik dpa allappoq.
Ajunaartut ajoqusersimasullu nunanit assigiinngitsuninngaanersuusut, isumannaallisaasut oqaaseqartuata oqaatigaa.
Neriniartarfiup qaliaata nakkaannera sumik pissuteqarnersoq ilisimaneqanngilaq.