Malittarisassat IAp sukatilersaarpai
Suliffeqarfiit nunanit allamiunik sulisussarsiorniarunik tamanna kommunalbestyrelsemut qinnuteqaatigisarpaat, akuerineqartarlutillu aatsaat atorfimmut Nunatsinni innuttaasunik pisinnaasoqanngikkaangat. Ullut 14-it ingerlaneranni kommunimit akissummik takkuttoqanngippat tamanna akuersinertut isigineqartarpoq.
Taama pissuseqarneq Inuit Ataqatigiit atorunnaarsikkusuppaat. Ullut 14-it ingerlaneranni akuersissummik pisarnerup sivitsorneqarnissaa Inatsisartunut aalajangigassanngorlugu siunnersuutitut Juliane Henningsenip, Aqqaluaq B. Egedep aamma Olga P. Berthelsenip oqaluuserisassanngortippaat. Aalajangiisarnerit ullui sivitsorneqarpata Nunatsinni innuttaasut amerlanerit periarfissinneqarnissaat IA-p siunertaraa.
Illoqarfinni arlalinni suliffissaaleqinerujussuaq atuuttoq taakkulu ikiliartunngitsut IA-p siunnersuuteqarnerminnut peqqutigaat.
- Illoqarfinni annerni takulertornartoq tassaavoq, sulisussanik avataaneersunik tikisitsiuarneq - pingaartumik sanaartornerup, eqqiaasitsinerup, akunnittarfeqarnerup neriniartarfeqarnerullu iluini, uffa atorfiit tamakku nunaqavissunik kivinneqarsinnaassasut takorloornaraluartut. Nunatsinni suliffissaaleqisut amerliartorput taamaatumillu Inuit Ataqatigiit isumaqarput atorfiit inuttaqanngitsut sapinngisamik nunaqavissunik inuttalerneqartassasut, Inatsisartut upernaamut ataatsimiinnissaanni oqaluuserisassatut IA-mit siunnersuut ilaatigut taama nipeqarpoq.