Malene Ingemann: IA sapiissuseqanngimmat qimappara
Partii Naleraq tunuliaqutsiullugu Inatsisartunut qiningassanngortittoq, Sisimiormiu Malene Ingemann, taama oqarpoq.
Inuit Ataqatigiit taamaalillutik SIulersuisuunerni ilaasortamik annaasaqarput, takornariartitsisinermik sulialik taanna IA-mi aningaaserisuunerugaluarmat .
- Inuit Ataqatigiit tunngaviusumik isummersortaasiannut isumaqataagaluarpunga. Nunattali aningaasatigut siumut aallarteqqinneqarnissaa eqqarsaatigalugu, IA politikkikkut sapiissuseqarnermik takutitsinngilaq naak tamanna pingaaruteqarluaraluartoq, Malene Ingemann oqarpoq.
Taanna aperaarput sutigut pitsanngorsaasoqarsinnaanersoq politikkikkut sapiissuseqarluni aningaasarsiorneq ilorraap tungaanut saatinneqassappat. Malene Ingemannilu siullermik akivoq, pisortat ingerlataat nutaamik ilusilersorlugit aallaqqaataaniit aaqqissuunneqartariaqartut inuiaqatigiinnillu sullissinermi pingaarnerpaaginnaat aallunneqalernissaat salliutinneqartariaqartoq oqaatigalugu.
Malene Ingemann nangilluni ima aamma akivoq.
Aamma atuaruk Ilulissani qineqqusaarneq takoqqiguk
- Suliffeqarfiit pisortanit ingerlanneqartut pitsanngorsarneqarnerisigut aamma taakkunani atorfiit pisariaqartinneqartut inuttalersorluarneqarnerisigut, siunissaq ungasinnerusoq eqqarsaatigalugu, Nunatta aningaasarsiornikkut pisariaqartitaat siumut aatsaat aallartinneqarsinnaapput.
Partii Naleraq tunuliaqutsiullugu Inatsisartunut qiningassanngortittoq, Malene Ingemann taama oqarpoq.
Aamma atuaruk Egedep Olsvigillu sineriak nukittorsarusuppaat
Taassuma Partii Naleqqamut nuunnerani, Qeqqata Kommuniani Inuit Ataqatigiit sinnerlugit kommunalbestyrelsemut ilaasortaq maanna ataasiinnanngorpoq tassalu Agathe Fontain kisimiileerluni.
Qineqqusaarneq tulleq Sisimiuni unnugu pissaaq, KNR-TV-kkut Radiokkullu toqqaannartumik kalaallisut aallakaatinneqassalluni unnugu nalunaaqutaq arfineq pingasut qeqqaniit, qallunaatut qulip qeqqa aallakaatinneqassalluni. Aallakaatitsinerit taakku marluk tamarmik toqqaannartumik nutserneqassapput, tamanna tusarnaarneqarsinnaalluni KNR-TV 2-kkut.