Malamuit Qaanaap eqqaaniittut timmissat nappaataanik sakkortuumik napparsimalersitsisinnaasunik nappaatillit naammattoorneqartut.

Malamuit Qaanaap eqqaaniittut timmissat nappaataanik sakkortuumik napparsimalersitsisinnaasunik nappaatillit naammattoorneqarput.

Timmissanit tunillatsissimasunit timmissat nappaataanik inuit tunillanneqarsinnaapput taamatut pisoqarsinnaaneratalu aarlerinassusaa annikitsuararsuusutut nalilerneqarpoq.

Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfik tusagassiorfinnut nalunaarummi taama allappoq, taakkua erseqqissaatigaat, timmissat toquinnarsimasut oqartussanik isumaqatigiissuteqareernikkut taamaallaat passunneqartariaqartut.

Timmissat toqusimasut mianersuullugit passunneqartarnissaat UNIO-mit kaammattuutigineqarpoq:

- Qaqorsaaserlutit assatit asattakkit, pingaartumik erlaveersereernermi.

- Timmissat erisarnagit amiikkit (pujoralatserinnginneruvoq).

Neqit manniillu nualluummik virusitaqarunik ooqqissunngorlugit siallugit/qalallugit verusitaat toqunneqartarput.

Ukioq kingulleq malamuk toqungasoq siumorneqartoq

2024-mi oktoberip aallartisimalernerani Qaanaap sineriaata avataani malamuk toqungasoq tiguneqarsimavoq.

Sumiiffinni pineqartumi timmissat napparsimasut aamma toqungasut pillugit innuttaasut nalunaaruteqartarnerisa kinguneranik katersineq aallartinneqarsimavoq.

Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfiup, Pinngortitaleriffiup najukkamilu innuttaasut Danmarkimilu Fødevarestyrelsip suleqatiginerisigut tamanna pivoq. Timmiaq Københavns Universitetimi Statens Seruminstitutimut timmissat nappaataanik nappaateqarnera misissugassanngorlugu nassiunneqarsimavoq.

Misissuinerup takutippaa timmiaq timmissat nappaataanik sakkortuumik napparsimalersitsisinnaasumik H5N5-imik nappaateqartoq.

Nappaatit sakkortuumik napparsimalersitsisinnaasut tassaapput nappaatit timmissat toqorarnerujussuanik malitsillit. Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfimmiit tusagassiorfinnut nalunaarummi taama allapput.

Timmissat nappaataat taanna Canadami Nunavummi Islandimilu timmissanit nassaarineqarsimasunit allaanerunngilaq. Taannalu aamma miluumasuni nassaarineqarsimavoq. 

Asimi timmissanik toqungasunik nassaaraanni, attavigiuk Uumasunut Nakorsaqarnermut Inuussutissalerinermullu Oqartussanut uumasut@nanoq.gl-imut imaluunniit 34 50 00-imut ammasarfiup iluani, tassa ataasinngorneq, marlunngorneq, sisamanngorneq tallimanngornerlu nal. 9.00-imiik 15.00-ip tungaanut.