Nunavik Makivik illoqarfimmi Kuujjuarmi naatitanik naatitsilluni misiliinialerpoq

Akilinermi Nunavimmi naggueqatigiit inuit suliniaqatigiiffiat Makivik Korporation naatitanik naatitsisalerniarluni Kuujjuarmi misiliinialerpoq.

Allattoq Marianne Stenbæk, Montreal, Canada

januaarip 03-at 2019 19:20

Nutserisoq Jaaku Lyberth

Canadap issittortaani nerisassat akisunerujussuat ajornartorsiutaavoq, naatitanillu nutaanik pissarsiniartarneq ajornartorsiutaavoq, taakkua timmisartumik assartorneqartarnerat akisoorujussuugami.

Taamaattumik suliniaqatigiiffik Makivik illoqarfimmi Kuujjuarmi naatitanik naatitsilluni misiliinialerpoq.
Naatitat containerini 40 fodsitut angitigisuni naatinneqartassapput, containeri illoqarfiup Kuujjuaq qeqqani inissisimavoq.

Containerini naatitanut naatitsivinnik angisuunik naggorissaatitalinnik inissiisoqarpoq.
Containerit qullernik LED-inik qullilersorneqarput iluani 18-it 21-illu akornanni kiassuseqassallutik.

Naatitat naatinneqarneranni issumik atuisoqassanngilaq.
Imeq naggorissaatinik akusaq atorlugu naatitsisoqartassaaq William Tagoona, Makivimmi oqaaseqartartoq oqarpoq, containerit illoqarfimmi niivertarfiutilimmit isumagineqartassapput, illoqarfimmili innutaasut arlaqartut, naatitat isumagineqartarnissaannut novemberimi pikkorissartinneqassasut, Tagoona oqarpoq.

Aallaqqaammut salatinik kinakålinik akuutissanillu naatitsisoqassaaq.
Naatitat jannuaarip qeqqata missaani tuniniarneqalissasut, Tagoona oqarpoq.

Naatitanik naatitsisarnermik misiliineq iluatsippat, nunaqarfinni allani containerini naatitsisalernissaq Makiviup sulissutiginiarpaa

Containerini naatitanik naatitsisarnerit Ottawami suliffeqarfiup Growcerip ineriartortitaraa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.