Macronip Nigerimi sakkutuujutitik aallartitatillu angerlartinniarai
Nigerimi sakkutuut nunami tassani præsidenti uppisereeraallu Frankrigip sakkutuujutini aallartitanilu angerlartinniarpai.
Frankrigip præsidentia, Emmanuel Macron, Frankrigimi tv-qarfimmut sapaammi apersorneqarluni taama oqarpoq.
Aallartitaq Frankrigimut siunissami qaninnermi angerlarumaartoq Frankrigillu sakkutuui qaammatini tulliuttuni angerlartinneqarumaartut, Macron oqarpoq.
Frankrig Nigerimi præsidentimik uppisitsisunit sallunaveeqqutitut tigummiagaassanngitsoq, taassuma nassuiaatigaa.
Nigerimi præsidentitut qinigaasimasoq, Mohamed Bazoum, sakkutuunit ukioq manna juulimi uppisinneqarpoq.
Bazoum Nigerimi præsidentitut suli isigalugu Macronip Frankrigimi tv-qarfinnut TF1-imut France 2-mullu erseqqissaatigaa.
Mohamed Bazoum præsidentitut juulip ulluisa 26-anni uppisitaavoq.
Sakkutuut imminnut naalakkersuisunngortipput, Bazoumilu ilaqutaasalu maanna parnaarussaaqqallutik.
Niger Frankrigimit nunasiaatigineqarnikuuvoq, Bazoumillu præsidentitut atorfimminut uterteqqinneqarnissaa piumasarisimallugu.
Sakkutuulli imminnut naalakkersuisunngortittut taamaaliorsimanngillat, Frankrigillu Nigerillu akornanni pissutsit nunami tassani præsidentip uppisitaanerata kingorna ajorseriaannarsimallutik. Nigerimi naalakkersuisunik uppisitsisut inatsisit unioqqutillugit aqutsisuusut, Frankrigip oqaatiginikuuaa.
Nigerip illersornissakkut Frankrigimut isumaqatigiissusiai Nigerimi naalakkersuisunik uppisitsisunit aggustip ulluisa pingajuanni atortussaajunnaarsinneqarput.
