Maalaartarfik: Ukiut tallimat qaangerneqaqqusaanngillat
Arnaq naammagittaalliortoq illissamigut tigusiffigitilluni taamani misissortikkami misissuinerup inerneri kukkusumut inissinneqarsimapput, tamannalu inuuneranik akeqangajappoq. Naammagittaalliuut pisoqalisimavoq, maalaartarfik naliliivoq.
-Naammagittaalliorniaraanni kukkunerup paasineranit ukiut marluk qaangiutsinnagit naammagittaalliortoqarsinnaavoq imaluunnit suliaritereernerup kingorna ukiut tallimat. Ukiut tallimat qaangerneqaqqusaanngilluinnarput, kialuunni oqartussaasup tamanna allanngortissinnaanngilaa. Ullorluunnit ataaseq kingusinaalaaraluaraanni kingoqqutsinertut nalilerneqartarpoq suliassanngortitarlu suliarisinnaajunnaartarparput, Thomas Anker-Møller Patientombudimi allaffimmi pisortaq nassuiaavoq.
Patientombudip Danmarkimiittut nunatsinnit naammagittaalliuutit ilanngullugit suliarisarpai.
32-nik ukiulik Karina Brudlykke nakorsiartarfimmit 2007-imi kukkuluttorfigineqarujussuarnermi kingornatigut akisussaaffimmik inisseerusulluni imaluunnit taarsiiffigeqqulluni naammagittaallioraluarami iluatsitsinngilaq.
Illissap paavatigut kræfteqalersinnaaneq pillugu ukiut pingasukkaarlugit misissuisarnissamik arnanut neqeroorut maleqqissaarlugu Karina Brudlykke misissortittarsimavoq. 2007-imi misissortikkami tigusaat Rigshospitalimut misissugassanngorlugit nassiunneqarput, misissuinerilli inerneri nunatsinnut nassiunneqarmata kukkuneq pivoq.
-Misissuinerit inernerini allaqqavoq kræftinnguussinnaasunik naasoqarsimasunga. Nakorsiartarfimmiilli akissutisigama pappialani allanneqarsimavoq sumilluunnit taasassartaqanngitsoq. Taamanernit isumaqarsimavunga suna tamarmi pissusissamisut ittoq, sunaaffali taamaanngitsoq. Danmarkimi 2011-imi misissortereerlunga paasitinneqarpunga illissamma paavatigut kræftealersimasunga piaartumillu suliarineqartariaqartunga, Karina Brudlykke nassuiaavoq., indtil jeg i 2011 fik konstateret livmoderhalskræft og skulle opereres akut i Danmark, siger Karina Brudlykke.
AAMMA ATUARUK Nakorsiartarfiup kukkunera inuup inuuneranik akeqangajappoq
Naammassilluartumik suliaritereerami akisussaaffiliisoqarnissaa anguniarlugu naammagittaalliuummik allagaqarpoq, tamannalu 2013-imi pivoq. Danmarkimili maalaartarfiup suliassaq pisoqalisimanerarlugu tigujumanngilaa. Inatsisit erseqqipput, ukiut tallimat qaangerneqaqqusaanngillat, Thomas Anker-Møller erseqqissaavoq.
Aamma oqarpoq suliassanngortitamik taama ittumik aatsaat takulluni.
Karina brudlykke nunatsinnilu nakorsaaneqarfiup akornanni allaqatigiinnerit assilineri radioaviisimit pivavut, taakkunanilu atuarneqarsinnaavoq nakorsaaneqarfiup peqqinnissaqarfimmi akisussaasut suleriaatsit naammannersut iluarsisassaqarpallu iluarsissanersut misissoqqullugit ukioq manna januaarimi kaammattorsimagai. Nakorsiartarfimmit oqaaseqartitsiniaraluaratta iluatsinngilarput.
Danmarkimi maalaartarfimmit Patientombudimi allaffimmi pisortaq Thomas Anker-Møller oqarpoq, Karina Brudlykke naammagittaallioqqinnissaminut periarfissaqartoq, qanorli inerneqassanersoq siumoorlugu oqaaseqarfigisinnaanngilaa. Karina Brudlykkep Danmarkimi oqartussanut nunatsinnilu nakorsaaneqarfimmut suliassanngortitseqqinnissani maanna isumaliutigai.
