Nakorsiartarfiup kukkunera inuup inuuneranik akeqangajappoq

Kukkunerup arnap inuunera ulorianartorsiortissimavaa. Tamanna pillugu taarsiiffigineqarsinnaanngilaq, kiallu kukkuneq akisussaaffigineraa inissinneqarsinnaanani.

Qallunaaq Karina Brudlykke 32-nik ukioqartoq ukioq 2007-imi Nakorsiartarfimmi illissap paavatigut kræftimut misissortissimavoq. 

Misissuinerit misissugassanngorlugit Rigshospitalimut nassiunneqarsimapput. Misissuinerillu inerneri Kalaallit Nunaannut utertinneqarsimapput.

- 2007-imi nakorsiartarfimmit paasitinneqarpunga journalinni allassimasoqanngitsoq kræfteqalersinnaasunga. Kisianni misissuinerit inernerisa takutippaat kræfteqalernissannut ilimanaateqartunga. 2011-ip tungaanut isumaqarujoorsimavunga ajoquteqarnanga. Ukioq taanna illissap paavatigut kræftimik nappaateqalerpunga, Karina Brudlykke oqarpoq.

Illissap paavatigut kræfteqartoq paasineqarpat, piaarnerpaamik suliarineqarsimavoq, nappaallu anigorlugulu.

Naak misissortereernermi kingorna nalunaarfigineqarsimagaluarluni ajoquteqarani, tupigusuutigilersimavaa sooq kræftilernissamut ilimanaatit siusinnerusukkut paasineqarsimanngitsut.

Tamanna pillugu Karina Brudlykkep nakorsaq piumaffigisimavaa siuliani misissortissimanermi inernerit misissoqqullugit, kingornalu paasisimavaat Kalaallit Nunaanni misissortikkami illissap paavatigut sananeqaataa allanngorsimasoq, suliarineqanngikkunilu kræftinnguussinnaalluni.

Tamanna pillugu Nakorsiartarfimmut paasiniaalluni sianersimavoq. Paasisimavaalu journalimini allaqqasoq annerusumik nalunaarutissartaqanngitsoq, naak misissuinerit takutikkaat kræfteqalernissaminut ilimanaateqartoq. Suliaq qaqeqqinnissaanut naammagittaalliornissaminullu kaammattorneqarsimavoq. 

- Napparsimavimmi arnap sulisup ilimagaa journalera kukkusumik inissinneqarsimasoq. Imaluunniit kukkusumik allattoqarsimasoq. Taamani Rigshospitalimut Nakorsiartarfimmit faximik nassiussiinnartarnikuupput. Taanna arnaq nakorsiartarfimmi sulisup eqqoriaannarpaa kukkusoqarsimasoq.

Karina Brudlykke Danmarkimi Patientombuddemut, tassa napparsimasunut sullissivimmut, nunatsinnilu nakorsaanerit aqutsisoqarfiannut naammagittaalliuuteqarsimavoq.  Naammagittaalliuulli qaqinneqarnissaanut itigartinneqarsimavoq, kukkuneq ukiut tallimanik sinnerlugit matuma siorna pisimammat.

Qallunaat nunaannilu taarsiiffigineqarsinnaanngilaq, kukkuneq nunatsinni pisimammat.

- Neriuutiginerpaavara naapertuilluartumik naammassineqassasoq. Akisussaaffimmillu tigusisoqassasoq. Kukkunermi angeqaaq, kræfteqalerpungami. Neriuutigaaralu arnat allat taamatut misigisaqassanngitsut. Ataqatigiissaanerinerit aaqqissorneqartariaqarput. Misissuinerimmi inerneri Kalaallit Nunaata Danmarkillu akornanni tammarsinnaapput, Karina Brudlykke oqarpoq.

Dronning Ingridip Napparsimmavissuani aqutsisunik aammalu qallunaat nunaanni Patientobuddi oqaaseqartinniaraluaratsigit iluatsinngitsoorpagut