Maajip aallaqqaataa aatsaat taama pingaaruteqartigaaq
Maajip aallaqqaataa Naalakkersuisut siulittaasuannut qanoq isumaqarnersoq apeqqutigaarput, taannalu ima akivoq:
- Uannut isumaqartorujussuuvoq. Sulisartut uanga aamma peroriartorfigaakka. Anaanaga sulsartuunikuugami, taamaattumik ulloq taanna pingaartorsiutigisarpaat, nalliuttorsiutigisarpaat, atukkami pillugit qaqiliinissaminnut atortarpaat, iluarinngisaminnik iluarisaminnullu tunngatillugu oqaasertaliisinnaanissamut periarfissatsialattut atorneqartartoq eqqaamavara. Ileqqorlu taanna isumaqarpunga pitsaasuusoq, inuiaqatigiinnilu nalliuttorsiutaasarluni. Tamanna uanga nangeqqikkusuppara, Naalakkersuisut siulittaasuat Aleqa Hammond oqarpoq.
Taanna maajip aallaqqaataanut atatillugu oqalugialeruni, Sisimiuni oqalugiassaaq, Qeqqata Kommuniani borgmesteri Hermann Berthelsen peqatigalugu oqalugiassalluni.
Aleqa Hammond A/S Inissiaatileqatigiiffiup INI-p ukiumoortumik ataatsimeersuarnissaanut Naalakkersuisut sinnerlugit peqataajartussaaq, tassalu tamanna pissutigalugu ullumikkut Sisimiuniittussaalluni.
Pisortani sulisut Maajip aallaqqaataani ullup affaannaanik sulisarnerat attatiinnarneqassanersoq, Aleqa Hammondimut apeqqutigaarput. Pisortanimmi sulisut ullup affaannaanik sulisarnerat inuiaqatigiinnut akisusinnaavoq. Naalakkersuisullu siulittaasuat ima akivoq:
- Maajip aallaqqaataa Sulisartunut ulluinnaanani, Namminersorlutik Oqartussanut aamma pingaaruteqartuuvoq. Taamaattumik maajip aallaqqaataa sulisartunut pingaartinneqarluni aamma Namminersornerulluni Oqartussaanerup taamani eqqunneqarneranut ulloq aamma pingaartinneqarluni. Upernalerneranik soorlu aamma aallartiffiusartoq, aamma periarfissatsialaasarpoq isinik nutaanik takunnissinnaaneq, ikaarsaarfeqarsinnaanissamullu aamma takunniffiusinnaalluni. Tamanna atorluartarparput, taanna eriagisassaavoq, ileqqorlu taanna pitsaasuusoq isumaqarpunga, Naalakkersuisut siulittaasuat Aleqa Hammond oqarpoq.
