München qalipaasersorsimasunik erfalasulersussamaartoq

Tyskit arsaattartui Ungarnimut ullumi pingasunngornermi unammilerunik arsaattarfiup ilua suiaaqatinoortut erfalasuattut qalipaasersorneqarnissaa, Münchenip borgmesteriata Dieter Reiterip kissaatigaa.

Ungarnimi ilaqutariit meeqqallu illersorniarlugit suiaaqatinoornermut tunngasut tamaasa 18-iliisimanngitsunut inerteqqutinngortitsiniarnerat akerliuffiginiarlugu Münchenip borgmesteria taamaaliorniarpoq, Tysklandimilu illoqarfinni allani aamma taamaaliortoqarniarpoq.

AAMMA ATUARUK Ungarnimiut tuusintilikkuutaat suiaaqatigiittarnermut inatsisissatut siunnersuut akerlerigaat

Arsaattarfiit 46-t suiaaqatiminoortut erfalasuattut qalipaasersorneqarnissaat maanna siunniunneqarpoq.

Münchenimi oqartussat Ungarnimi innuttaasut qinigaannut akerliullutik arsaattarfiup suiaaqatiminoortut erfalasuannik qalipaasersorneqarnissaa qinnutigigaluarpaat, Isikkamilli Arsaattartut Europami Kattuffissuup UEFA-p qinnuteqaat itigartippaa, UEFA-mi isumaqarpoq Münchenip iliuuseriniagaa Ungarnip naalagaaffianut akerliunermik toqqaannartumik takutitsinerusoq politkkimullu attuumassuteqartoq.

AAMMA ATUARUK Uefap erfalasut qalipaasersorneqarsimasut EM-etoqarnerani itigartitsissutigaat

Borgmesterili Reiteri tunniutiinnarnianngilaq. Arsaattarfiup suiaaqatiminoortut erfalasuannik qalipaasersorneqarnissaa naalakkiutigisinnaanngilaa, suiaaqatiminoortulli erfalasuat rådhusip silataani amuneqassaaq, soorlu illoqarfimmi ornigarneqarluartartuni assigiinngitsuni erfalasoq amuneqassasoq.

- Ungarnip iliuuserisaanut akerliunerput takutinniarparput UEFA-llu unitsissanngilaatigut, Dieter Reiter aviisimut Süddeusche Zeitungimut oqarpoq.