Múte B. Egedep nakorsaanerullu ammaaqqinnissamut pilersaarut saqqummiutileraat
Naalakkersuisut Nakorsaaneqarfiullu nunatta ammaqqinnissaantu pilersaarut aqagu ualikkut ataatsimut saqqummiunniarpaat.
Tamanna Nuummi tusagassiortunik katersortitsinikkut ingerlanneqassaaq.
Matumani Naalakkersuisut siulittaasortaavata, Múte Bourup Egedep (IA), peqqissutsimut naalakkersuisup, Naleqqamit, Kirsten Fenckerip nakorsaanerullu Henrik L. Hansenip ammaaqqinnissamut pilersaarut saqqummiutissavaat.
Nunatsinnut aqqut juullip ukiortaallu akornanni matuneqarpoq.
Nunatsinnut aqqut Kangerlussuarmiittoq apriilip ulluisa 18-iata tungaanut matoqqasussatut pilersaarutigineqaraluarpoq, killilersuinerilli sivitsorneqarpoq.
AAMMA ATUARUK Killilersuinerit sivitsorneqarput: Nunatsinnut killeqarfiit maajip ulluisa aappaannut matoqqassasut
Killilersuinerit maanna sapaatiuppat atorunnaartussaapput, tamannalu politikerit Nakorsaaneqarfiullu aqagu ualikkut ataatsimut paasissutissiissutiginiarpaat.
Nunarput silaannakkut angallannermut ukioq ataaseq matuma siorna aamma ammaqqittussanngornikuuvoq. Taamani ammaaneq immikkoortukkaartumik ingerlanneqarpoq.
Immikkoortumi siullermi amerlanerpaamik 600-t sapaatip akunneranut tikissinnaatitaapput.
Immikkoortup aappaani 1200-t, immikkoortullu pingajuanni timmisartuussineq nalinginnaasunngoqqippoq, ilaasullu qanoq amerlatiginissaannut killilersuisoqarani.