Múte B. Egede: Tunillaassuuttoqarnera nakkutigineqarsinnaagunarpoq
Coronamik tunillatsissimasut nutaat tallimat Nuummi sapaatip akunnerani ataatsimi uppernarsarneqarput.
Illoqarfiit pingaarnersaanni kingullermik decembarimi tunillatsissimasumik uppernarsaasoqarnikuuvoq.
Nuuk ilaannakortumik ippassaq matuvoq – tunillatsissimasullu nutaat pingasut ullumi nalunaarsorneqarput.
Innuttaasut tamarmik tunillaassuuttoqarnissaanut aarlerinaatit annikillisinniarlugit maleruagassanik eqqumaffiginnilluinnarnissaat innersuussutigineqarpoq:
- Qanillinaveersaarit.
- Assavit eqqiluitsuutinnissaat eqqaamajuk.
- Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.
Taamaakkaluartoq tunillaassuuttoqarnera nakkutigineqarsinnaasoq, Naalakkersuisut siulittaasuat, Múte B. Egede (IA) tusagassiortunik katersortitsinermi oqarpoq.
Tunillatsissimasut suliffeqarfimmi ataatsimi sulisuupput. Taakku mittarfiup eqqaani najugaqarfimmi najugaqatigiipput.
- Taamaammat tunillaassuuttoqarnera nakkutigineqarsinnaagunarpoq, Naalakkersuisut siulittaasuat oqarpoq.
- Nuummi killilersuinerit ippassaq saqqummiunneqartut ataasinngorneq ilanngullugu atuukkallassapput.
Tunillatsissimasutut uppernarsarneqartut tamarmik mittarfiliortuusut
Tunillatsissimasut Munch Gruppenimi, Nuummi nutaamik mittarfiliornermik suliaqartumi sulisuupput.
Tunillatsissimasutut ippassaq uppernarsarneqartut nunatsinnut qangali tikittuupput.
Nakorsaaneqarfimmit Paneeraq Noahsenip tamanna qangaanersoq oqaatiginianngilaa. Taakkuli tikinnerminnit angerlarsimaannarsimallutillu ullut tallimassaanni misissorteqqinnikuusimasut paasissutissiissutigaa.
AAMMA ATUARUK Nuummi killilersuinerit sukaterneqarput
Maannali tunillatsissimasutut uppernarsarneqarput – taamaammat Nuummi tunillatsissimallutik. Tunillatsissimasutut sisamanngornermi unnukkut uppernarsarneqartoq aamma Nuummi tunillatsissimavoq – taannalu sapaatip akunnerata naanerani illoqarfissiornikuulluni.
Taamaalilluni coronamik tunillatsissimasutut uppernarsarneqartunit arfinilinnit nutaanit sisamat Nuummi tunillatsissimasuupput.
Maannakkutut isikkoqartillugu taakku sisamat illoqarfiup iluani tunillatsissimanngillat, Paneeraq Noahsen oqarpoq.
- Taakku najugaqarfimmi najugaqatigiipput.
Politiit tuniluuffiusinnaasunik maanna misissuileruttorput. Tunillatsissimasutut uppernarsarneqartut nutaat Munch Gruppenip avataani attavigisimasaat pissarsiarineqarlutillu misissortissapput.
Tallimanngornermi misissortittorpassuusut
Tunillatsissimasumik sapaatip akunnerata naanerani illoqarfissiortoqarsimanera pissutigalugu ippassaq misissortittorpassuupput. Neriniartarfimmi Herefordimi imaluunniit imerniartarfinni Skylinemi Daddysimilu arfininngornermi unnukkut sapaatillu unnuaani piffissami aalajangersimasumi isersimasimasut tamarmik misissortikkiartornissaat kaammattuutigineqarpoq.
Tamanna pissutigalugu illoqarfiup qeqqatani Brugsenip eqqaani misissuisarfiup tungaanut siuleriiaattorpassuupput.
Munch Gruppenimi sulisut 80-it missaanniittut ippassaq aamma misissorterrapput.
Tallimanngornermi ualikkut misissortinniarlutik siuleriiaattut. Assi: Malik Brøns/KNR
Taamaammat Nuummi inuit 400-t missaanniittut covid-imut ippassaq misissortipput. Misissukkaniillu 400-t missaanniittunit pingasut tunillatsissimasutut uppernarsarneqarput.
Tunillatsissimasunit ataasiinnaq napparsimalersimavoq. Pineqartoq Dronning Ingridiup Napparsimmavissuani misissortippoq, angerlarteqqinneqarlunili.
Tunillatsissimasunik marlunnik allanik Nuummi sapaatip akunnerani siusinnerusukkut uppernarsaasoqarpoq. Taakku angerlarsimaannarsimasuupput tikinneranniillu ullut tallimassaanni misissortinneranni tunillatsissimasut paasineqarluni.
Tunillatsissimasumik ataatsimik Pituffimmi uppernarsaasoqaqqavoq.
Tunillatsissimasutut Nuummi uppernarsarneqartup ataatsip sumi tunillatsissimanera ilisimaneqannginnera pissutigalugu corona pillugu pissutsit Nuumi allaanerupput. Tunillatsissimasorlu ataaseq Nuummi pinsikkut nalaanni illoqarfissiorsimanera pissutigalugu killilersuinenrit uku saqqummiunneqarput:
- Maannakkumit ataasinngornerlu ilanngullugu Nuummiit angalanerit unitsinneqarput.
- Pisariaqavinngitsumik Nuummut angalanak.
- Sinersortaat Nuummiit ullumi aallassaaq, Nuummiilli ilaasoqassanngilaq. Illoqarfiit pingaarnersaanit angalasussanik ikisoqassanngilaq.
- Tunillatsissimasutut uppernarsarneqarsimasut pingasut suliffigisaanni sulisut tamarmik angerlarsimaannartinneqarput. Taakku misissortinnerat ullaaq arfineq pingasunut aallartinneqarpoq.
- Imerniartarfiit, timersortarfiit tusarnaartitsinerit ataasinngorneq ilanngullugu matuneqarput. Tamanna sivitsorneqaratarsinnaavoq.
- Inunnit ornigarneqarsinnaasuni - matumani pisiniarfiit ilanngullugit anersaartuutinut illersuuteqarfiunissaat piumasaqaataalerpoq.
- Bussini aqqaneq-marluleereersimasut tamarmik anersaartuutinut illersuuteqassapput, bussinilu issiaviusinnaasunit amerlanerusunik ilaasoqassanngilaq.
- Nuummi 50-init 64-inut ukiullit akornanni akiuussutissamik kapuinerit sukkatsisinneqarput. Taakku sapaatip akunnerata tullianit akiuussuserneqassapput.
