Múte B. Egede siulittaasunngorpoq
Inuit Ataqatigiit immikkut ittumik ataatsimeersuarneranni Múte B. Egede siulittaasussatut toqqarneqarmat katersortarfimmi ersaattaattut nipikinngillat. Siulitaasuusimasup Sara Olsvigip oktobarip 29-ani tunuarnerata kingorna siulittaasussamik nutaamik qinersineq Nuup katersortarfiani arfininngornermi pivoq.
Inuit Ataqatigiinni siulittaasup tullia Aqqaluaq B. Egedep Múte B. Egede siulittaasussatut piukkullugu innersuummagu allamik innersuussisoqarani toqqagaammat isersimasut nikutserlutik ersaattaateqaat.
AAMMA ATUARUK Múte B. Egede IA-mi siulittaasussatut sassartoq
- Siullermik maniguuppunga, kisianni aamma tulluusimaarpunga. Piareersimavungalu Inuit Ataqatigiit aammalu nunarput siulersussallugit, akisussaaffimmik tigusissallunga. Inuiaat neriuuteqarlutik aammalu siunissamut qaamanerusumut alloriarnissaannik toqqammavississallugit, Múte B. Egede KNR-imut oqarpoq.
- Mute B. Egede 1987-mi marsip aqarnanni Nuummi inunngorpoq Narsamilu peroriartorluni.
- kujataani ilinniarnertuunngorniarfimmi 2007-imi naammassivoq , ukiorlu taanna inuusuttut inatsisartuini peqataalluni.
- Nuummi ilisimatusarfimmi 2008-mi inuiaat kulturiat oqaluttuarisaanerallu ilinnialerpaa naminersortunngorninnili pissutigalugu ilinniakkani 2013-imi unitsippaa.
- Ukumi tassani Inuit Ataqatigiit siulersuisuunerinut ilaasortaalerluni, taavalu Inuusuttut Ataqatigiinni siulittaasunngorluni, 2015-ip tungaannut atuuffigisaminik.
- 2016-ip naalerneraniit 2017-imi decembarip allartisimanerneranut namminersorluni inuussutissarsiorpoq, piginneqatigiiffimmik, nerukkaatissanik naggorissaatinik assigisaannillu nioqquteqartumik, ingerlataqarluni.
- Mimi Karlsen 2015-imi napparsimalluni Inatsisartuni sulinngiffeqarmat Múte B. Egedep inatsisartuni sinniisaasutut ilaasortaalerpoq.
- Aatsitassanut ikumatissanullu 2016-imi oktobarimiit 2018-i aprili tikillugu naalakkersuisuuvoq.
- Taamatullu kommunenut, nunarfinnut, isorliunerusunut attaveqaqatigiinnermullu naalakkersuisoq Martha Lund Olsen, kommuninut 2017-imi qinersinissaq sioqqullugu naalakkersuisunit tunuartitaammat, taassuma akisussaaffii qaammatini pingasuni tigummiarlugit.
- Múte B. Egede qinersinermi kingullermi 233-nik taaguunneqarluni qinigaavoq.
Qinigaarlaaq oqalugiarnermini nunatta anguniagassaanik oqalugiaateqarpoq. Tassanilu immikkut taakkartukkamini eqqaasaa siulleq tassaavoq nunatta namminiilivinnissaata siunertaajuarnissaa. Nunatsinni meeqqanik imigassamillu atornerluinerup unitsinneqarnissaa aamma taassuma oqaatigaa, Inuusuttullu ilinniarnissaannik periarfissinneqarnissaat qulakkeerneqassasoq.
Akisussaassuseqartumik illuatungiliuttuuneq
Múte B. Egede Inuit Ataqatigiit sinnerlugit illuatungiliuttutut sulissuteqarniarpoq:
- Inuit Ataqatigiit illuatungiliuttutut akisussaassusiliittut partiitut angisuutut aammalu tunuliaqutaqarluartutut sulinerput nangissavarput. Suleqatigiikkusussuseqarnermik ingerlatsissaagut, kisiannili aamma ersarissumik aamma isornartorsiuinissanik oqaaseqartarumaarpugut piffissaagaangat.
AAMMA ATUARUK Aqqaluap Múte siulittaasussatut sassaqquaa
Aningaasamut inatsisissap isumaqatigiissutigineqarnera naapertorlugu Inuit Ataqatigiit naalakkersuisooqatigiinnut illuatungiliuttutut inissippoq. Tassungalu tunngatillugu Múte B. Egede ima oqarpoq:
- Naaperiaasinnaassuseqartariaqarpugut, suleqatigiissinnaassuseqartariaqarpugut partiit kikkuugaluaruttaluunniit, inuiaqatigiinni kinaagaluaruttaluunniit. Taamaalilluta angusassagut annerpaat aamma angusinnaagatsigit, Múte B. Egede oqarpoq.
Qineqqusaartut naligeeqisut
Siulittaasussamik qinersisoqareermat aaqqissuussaanikkut siulittasup tullianik nutaamik qinersisoqarpoq. Qineqqusaartullu marluupput tassalu Sofie Geisler aamma Agathe Fontain.
Naligiiffioqisumik qinersinertalimmik Agathe Fontain 31-nik qinerneqarluni qinigaavoq, Sofie Geisleri 30-nit qinerneqartoq.
AAMMA ATUARUK Sara Olsvig Inuit Ataqatigiit siulittaasuattut tunuartoq
