Inuit Ataqatigiit: Aqqaluap Múte siulittaasussatut sassaqquaa

Nalunaaqutaq 16:35 ilanngussaq: Múte B. Egedep oqaaseqarnera

Aqqaluaq B. Egede tusagassiutinut taama allaaserisaqarpoq.

- Piffissap ingerlanerani inuppassuit kaammattortarsimavaannga Inuit Ataqatigiinni siulittaasutut sassaqqullunga. Inuit tatiginninnerat qujassutigaara. Taamatullu inissinnissannut piffissaanngimmat nalunaarutigaara, Aqqaluaq B. Egede oqarpoq.

Taassuma Inuit Ataqatigiinni siulittaasup tulliatut atuuffeqarnini iluarisimaarpaa, attakkusullugulu.

AAMMA ATUARUK Sara Olsvig Inuit Ataqatigiit siulittaasuattut tunuartoq

Meeqqani kisimeeqatigalugit Inuit Ataqatigiit siulittaasuata tulliata oqaatigaa, politikkikkullu sulinermi saniatigut piffissaqarfiginissaat pingaartillugu, Inuit Ataqatigiinnilu siulittaasutut sassarnissamut maanna piffissaanngitsoq oqaatigalugu.

- Oqareernittut Inuit Ataqatigiit siulittaasussaattut sassaqqullugu kaammattorpara Múte Bourup Egede. Pisariaqarmat Inuit Ataqatigiinni siulittaasup naalakkersuinikkut sunniuteqarluarsinnaasumik, akisinnaasumik, aqutsinikkullu siunnerfinnik nutaanik nassaarniallaqqissuseqarnermik pigisaqarnissaa. Isumaqarpungalu Múte Bourup Egedep tamanna isumannaarsinnaagaa, Aqqaluaq B. Egede oqarpoq.

AAMMA ATUARUK IA-profiler melder sig i debatten

Aqqaluaq B. Egede siulittaasutut 2014-imi sassaraluarpoq, Sara Olsvigili 37-nit taaguunneqarluni taamanikkut siulittaasunngorpoq, Aqqaluaq B. Egede 35-nit taaguunneqartoq.

Múte Bourup Egedep Inuit Ataqatigiinni siulittaasutut sassarnissaanut Aqqaluaq B. Egedep kaammattuutaa suli eqqarsaatersuutigalugu, sulili aalajangiiffiginagu, Múte Bourup Egedep KNR-imut ualeq manna ilisimatitsissutigaa.

Inuit Ataqatigiit Nuummi immikkut ittumik arfininngornermi decembarip aallaqqaataani ataatsimeersuassapput.