Múte B. Egede IA-mi siulittaasussatut sassartoq

Allaaserisaq nal. 10:00 nutarterneqarpoq. Múte B. Egedep siulittaasussatut sassarnini tusagassiorfinnut nalunaaruteqarluni uppernarsarpaa.

Inuit Ataqatigiit Sara Olsvig kingoraarlugu siulittaasumik nutaamik arfininngornermi decembarip aallaqqaataani qinersissapput.

Inuit Ataqatigiinni maanna ataqatigiissaarinikkut siulittaasup tullia, Múte B. Egede, partiip immikkut ittumik ataatsimeersuarnerani partiimi siulittaasussatut sassarniarluni tusagassiorfinnut nalunaarutigaa.

- Inuit Ataqatigiit siulittaasussaatut sassarpunga piareersimavungalu partiip ingerlavigisariaqagaanut siulersussallugu. Inuiattut ullut neriuuteqarfiusut pilersissallugit piumassuseqarpunga piginnaaneqarfigaaralu angusaqarnissaq. Piareeqqavunga, Inuit Ataqatigiit piareeqqapput, siuttuuffigissallugu siunissaq nunatsinnut qaamanerusoq, Múte B. Egede oqarpoq.

Tassuma aamma oqaatigaa Inuit Ataqatigiinni siulittaasunngoruni ammasumik peqataatitsisumillu tunngavilimmik aqutsiniarluni. Aamma ullumikkut politikkikkut aqutseriaaseq ingerlatseriaaserlu allanngortariaqartoq innuttaasullu tikillugit peqataatillugillu ingerlatsisoqartariaqalertoq oqaatigaa.

Siulittaasussatullu sassartup politikkikkut immikkut suliniuteqarfigerusutani pingasut saqqummiuppai:

- Ullut 100-t siulliit siuttuuninni partiitta Inuussutissarsiornermut, Isumaginninnermut kulturimullu politikkiata nukittorsarneqarnissaat ukkatarissavavut inuiaqatigiit atukkatsinnut qitiulluinnarmata, Múte Bourup Egede oqarpoq.