Amagerimi pisiniarfissuarmi Fieldsimi inuit pingasut toqutaapput. Tamatuma saniatigut inuit sisamat aamma aallaaneqarput. Taakkunannga ataaseq peruluppoq.Assi: Scanpix

Múte B. Egede Fieldsimi aallaasersortoqarnera pillugu: Eqqugaasut eqqarsaatinniipput

Kalaalerpassuit Københavnimiikkaangamik Fieldsimut niuerniartarput. Pisiniarfissuarmiissimagaanni oqaloqateqarnissarlu pisariaqartikkaanni Tusaanngamut sianertoqarsinnaavoq.

- Eqqarsaatikka pinerlineqartuniipput aamma inuit asasaminnik annaasaqartut misiginneqatigaakka. Pisoq amiilaarnartuuvoq aamma eqqugaasut tamaasa eqqarsaatinniitsippakka.

Naalakkersuisut siulittaasuat, Múte Bourup Egede Københavnimi pisiniarfissuarmi Fieldsimi sapaammi aallaasersortoqarnerata kingorna tusagassiuutinut nalunaarummi taama oqarpoq.

Fieldsimi aallaasersortoqarnera ataatsimut isigalugu:

 

Københavnimi politiit pisiniarfissuarmi Fieldsimi aallaasersortoqartoq sapaammi nalunaaqutaq 17.36 (danskit nalunaaqutaat) nalunaarfigineqarput.
 

Politiit oqarnerat naapertorlugu Fieldsimi sumiiffinni assigiinngitsuni marlunni seqqortoqarpoq.

 

Inuit pingasut toqutaapput. Nukappiaraq niviarsiararlu 17-inik ukiullik kiisalu angut russitut innuttaassuseqartoq 47-nik ukiulik Danmarkimili najugaqartoq.

 

Tamatuma saniatigut inuit sisamat aamma eqqorneqarput. Taakkunannga ataaseq peruluppoq.

 

Inuit allat 23-t aallaasersortoqarnerani aamma ajoqusersimapput.

 

Politiit angut 22-nik ukiulik danskisut innuttaassuseqartoq aallaasersortoqarnerata kingorna tigusaraat.


Angut ataasinngornermi inatsit tunngaviusoq naapertorlugu killisiorneqarpoq. Angut taanna tarnikkut nappaatilinnut immikkoortortaqarfimmi matoqqasumi ulluni 24-ni tigummigallagassanngortinneqarpoq.

Aasaanerani sulinngiffeqarfiuvoq, Fieldsilu kalaalerpassuit Københavnimiinnerminni niuerniarfigisarpaat.

Pisiniarfissuarmiissimagaanni oqaloqateqarnissarlu pisariaqartikkaanni taava Tusaanngap oqarasuaataanut 801180-imut imaluunniit sms-ikkut 1899-imut attaveqartoqarsinnaavoq.

Tusaannga piffissani ukunani ammasarpoq:

Sapaat - sisamanngorneq 9:00 - 00:00
Tallimanngorneq - arfininngorneq 09:00 - 04:00

Danmarkimiikkuit ima ikiorneqassaatit

Københavnimi Psykiatrisk Center isiginnittunut inunnullu sapaammi Fieldsimiissimasunut ikiorneqarnissamik pisariaqartitsisunut tarnip pissusianik ilisimasalimmik ikiuinissamik neqerooruteqarpoq. Tamanna Kastrupimi Amagerhallenimi Løjtegårdsvej 64-mi pissaaq.

Danmarkimi illoqarfiit pingaarnersaanni eqqugaasunut siunnersuisarfik pinerluttuliorfigineqartunut ajutoornermilu eqqugaasunut, ilisimannittunut qanigisaasunullu ikiuinissamik neqerooruteqartarpoq. Eqqugaasunut siunnersuisarfik ulloq unnuarlu ammasarpoq oqarasuaammullu 2120 9170-imut sianerluni attaveqartoqarsinnaavoq.

AAMMA ATUARUK Sara Brandt Fieldsimi perusuersartarfimmi minutsit 15-ingajaat toqqoqqasoq

Meeqqanut inuusuttunullu oqaloqateqarnissamik pisariaqartitsisunut meeqqanut oqarasuaat 116 111 ulloq unnuarlu ammasarpoq, tassunga sms-imik nassitsinngikkuit sianersinnaavutit. Aamm Børnetelefonen allaqatigineqarsinnaavoq.

Røde Korsip ikiuinissamut oqarasuaataani tarnip pissusianik ilisimasallit oqarasuaatikkut 3529 9660-imut sianertoqarneratigut ikiuinissamut piareersimapput. Ikiuinissamut oqarasuaat nalunaaqutaq 09.00-imit 15.00-imut ammasarpoq.

Psykiatrifonden akeqanngitsumik atinillu isertuussilluni oqarasuaatikkut 3925 2525-kkut siunnersuinissamut piareersimavoq

Ørestadimi oqaluffik sapaatip akunnerani uani ataasinngornermiit tallimanngornermut nalunaaqutaq 12.00-imiit 15.30-p tungaanut immikkut ittumik ammassaaq. Oqaluffik tarnimikkut aliasuttunut, naneruutinik ikitserusuttunut imaluunniit najorteqatigiinnissamut pisariaqartitsisunut ammavoq. Ørestadimi oqaluffik uaniippoq, 8 Tallet, Robert Jacobsens Vej 72B, 2300 København S.

Uiverneq

Amagerimi pisiniarfissuarmi Fieldsimi inuit pingasut toqutaapput. Tamatuma saniatigut inuit sisamat aamma aallaaneqarput. Taakkunannga ataaseq peruluppoq.

Aallaasersortoqarnera pisiniarfissuarmi uivertoqarneranik pilersitsivoq. Inuppassuit pisiarfissuup anisarfiatigut qimarrapput, ilaallu pisiniarfinni toqqorterlutik.

AAMMA ATUARUK Lars Therkelsenip politiit sakkulersorsimallutik Fieldsip saaniittut takugai

Politiit aallaasersortoqarnera pillugu nalunaaqutaq 17.35-ip missaani siullermik nalunaarfigineqarput.

Angut 22-nik ukiulik pisiniarfissuup silataani nalunaaqutaq 17.48 tigusarineqarpoq – politiillu oqarnerat naapertorlugu tigusarinninnerat ”pissanganartorsiuallaanngilaq”.

Angut tarnimikkut napparsimasunut immikkoortortaqarfiup matoqqasuani ulluni 24-ni tigummigallagassanngortinneqarpoq.

Angutip 22-nik ukiullip unnerluutiginninnerit qanoq oqaaseqarfiginerai naluneqarpoq, inatsimmi tunngaviusoq naapertorlugu killisiuisoqarnerani matut eqqartuussisumit matuneqarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl