Timersorneq

Møllerip Marcialongami ajaappiarsorpallaarnini nukillaassutigigaa

Ujakkaartartup Martin Møllerip Italiami isorartuumut ujakkaarluni oqilaniunnermi Marcialongami peqataanini, talersorpallaarnini iluarivallaanngikkaluarlugu peqataasimanini peqqissimissutiginngilaa.

Martin Møller under La Sgambeda-løbet i Livigno (skøjtestil)

Her er Martin Møller under La Sgambeda-løbet i Livigno (skøjtestil)

Allattoq Camilla Dam

januaarip 29-at 2015 10:40

Ujakkaarluni oqilianiunneq 42-ssaanik sapaatiummat ingerlanneqarpoq - tamatumuuna ingerlaarfissaq kilometerinik 57-inik isorartutigaluni, pisarnertullu ujakkaarneq klassiskimik ingerlanneqarpoq. Martin Møller normu 55-inngorpoq, ajugaasumit norgemiumit Tord Asle Gjerdalenimit minutsit qulit missaannik kigaannerulluni.

- Ingerlaarfigisarput manissuuvoq, taamaammat ujakkaartartut amerlanersaasa sisoraatitik immikku pujassarsimanngilaat, aallartinnermiillu apuunnissamut ajaappiarsuinnaq ingerlaartoqarpoq.

Aamma atuaruk Danmarkimi ujakkaarluni pissartanngorniuttoqarnerani kalaallit marluk angusarissaartut

- Aallaqqaammut ingerlalluaraluarpunga, kilometerilli 20-t ingerlareerlunga siuttuusut akornanniikkunnaarlunga. Aqqutaa tamaat sukkasuumik ingerlaartoqarpoq. Ajaappiarsornissamik sungiusarpiarnikuunngilanga, taamaammat aamma nalunngilara taamatut unammeriaaseqartunut malinnaaniarnissara ajornakusoortissallugu.

- Normu 55-inngornera akunnagilaarpara. Unammeqataasut pikkorissorpassuarnik ilaqarput, aamma sivisunerusumik siuttuusut akornanniissallunga kissaatigigaluarpara, Martin Møller oqaluttuarpoq.

Ujakkaarluni oqilaniunneq, ujakkaartartut nunani tamalaani marathon cupiannut ilaasoq, 6.000-it sinnerlugit peqataasoqarpoq.

Martin Møller Nuummut angerlaqqereerpoq, Sverigemilu illoqarfimmi Falunimi nunarsuaq tamakkerlugu pissartanngorniunnissamut sungiusarnini naammassiniartussaassallugu. Pissartanngorniunnerit februaarip 18-iani aallartissapput.