Danmarkimi ujakkaarluni pissartanngorniuttoqarnerani kalaallit marluk angusarissaartut

Aasiammiu Karl-Peter Kristensen, ujakkaarnermi unammeriaatsimi skiathlonimi Danmarkimi pissartanngorpoq Iluliarmiorlu Frederik Petersen sølvinnalluni.
Allattoq Camilla Dam
januaarip 28-at 2015 14:31

Nittartagaq sermitsiaq.ag taama allaaserisaqarpoq.

Skiathlonimi 10 kilometerinut klassiskimik ingerlaaqqaariarluni ujakkaarutit sukuutserutinik taarsersinnarlugit taakkuninnga kilometerit kingulliit qulit ingerlanneqartarput. Karl-Peter Kristensen piffissami 1.05.33,8-mi apuuppoq, nunaqqatiminit minutsit pingasut missaannik sukkanerulluni.

Danmarkimi pissartanngorniunnerit Norgemi illoqarfik Gaustablikkimi ingerlanneqarput, Karl-Peter Kristensenilu sapaatiummat 15 kilometerinut sukuutserutinik unammisoqarmat bronzennappoq marlunngormallu sprinternermi sølvinnalluni. Frederik Petersen unamminerni taakkunani marlunni normu 7-inngorlunilu normu 5-inngorpoq.

Karl-Peter Kristensen Sverigemi illoqarfimmi Falunimi februaarip qaammataani nunarsuarmi pissartanngorniuttoqalerpat peqataassussaavoq, sungiusarnissanilu siunertaralugu Norge maanna qimassavaa, Frederik Petersenillu Danmarkimi pissartanngorniunnermi peqataanini arfininngorpat 50 kilometerinut oqilaniuttoqarneranut peqataalluni naggasissavaa.