Lynge qaaqqusaaneq pillugu: Pituffimmut kiffartuussinissamut isumaqatigiissut tigussavarput

Nunanut allanut naalakkersuisup, Steen Lyngep nalaakkersuisutut atuuffimmi aallarteqqammernerani nunarsuarmi nunat pissaaneqarnerpaat ilaata tassa USA-p nunanut allanut ministerianik, Mike Pompeomik ataatsimeeqateqartussanngorpoq.

Ataatsimeeqatigiinnermi suut oqaluuserineqassanersut suli paasisimanagit Steen Lyngep KNR-imut oqaatigaa. Taamaakkaluartoq Mike Pompeomut kissaateqarniarpoq.

- Pituffik suli isumaqatigiissuteqarfiginngilarput, taavaalu aaqqiivigineqarnissaa kissaatigingatsigu soorunami taanna apuutissavara, nunanut allanut naalakkersuisoq, Steen Lynge, KNR-imut oqarpoq.

AAMMA ATUARUK USA-p kunngeqarfiullu Pituffimmi kiffartuussinissamik isumaqatigiissut oqallisigigaat

Danskit nunanut allanut ministeriat Jeppe Kofod ataatsimeeqataassaaq, taassuma ataatsimiinnermi issittoq aamma sammineqassasoq TV2-mut oqaatigaa.

Steen Lyngep nunatta USA-llu qanimut suleqatigiilernerat nuannaarutigaa, tamannalu aamma Mike Pompeomut anngunniarpaa.

- Uanga Kalaallit nunatta soqutigisai taavalu USA-p qanimut suleqatigilernera nuannaarutigalugu nalunaarutigissavara, Steen Lynge oqarpoq.

Kiffartuussinissamik isumaqatigiissut

Amerikamiut ingerlatseqatigiiffiannik Vectrus Servicesimik maanna isumaqatigiissut 2024-mi atorunnaassaaq. Isumaqatigiissut taanna katillugu milliardinik marlussunnik naleqarpoq, ukiunilu 46-ini kiffartuussisuusimasumit Greenland Contractorsimit akikinnerulluni.

USA-p kunngeqarfiullu Danmarkip kiffartuussinissamik isumaqatigiissut oqallisigisaraat, isumaqatigiissutilli qaqugu suliariumannittuussarsiuunneqarnissaa suli piffissaliunneqanngitsoq USA-p illersornissaqarfia siusinnerusukkut nalunaarnikuuvoq.