Umiarsuarmik Kangerlussualiat silaannakkut apuuttut

Umiarsuaq takornariartaat, Sea Spirit Kangerlussuarmi umiarsualiviliarsinnaasimanngimmat ilaasut 200-t issittumi pinngortitamit immikkut misigisaqarput sineriatsinnilu umiarsuarmik sapaatip akunnera ataaseq takornariareerlutik Europaliaqqillutik.

Takornariartaat Sea Spirit Kangerlussuamiit 60 kilometerinik ungasitsigisumi Ikertup kangerluani sikoqarpallaarnera peqqutigalugu kisarsimasariaqarsimasoq, takornariartaassuarnik umiarsuaatileqatigiiffik Poseidon Expeditions nittartakkamini allappoq.

Tamannali taarsiullugu takornariartaammut ilaasut umiatsiamut pullattakkamut ilaallutik nunaqarfiusimasumut Sarqardlernukaanneqarput kingornalu takornarissat Kangerlussuarmiit timmisartortussat Air Greenlandimit qulimiguullit S-61-it atorlugit ikaarunneqarput.

Qulimiguulimmi ataatsimi inuit19-it ilaasinnaasarput taakkulu saniatigut takornarissat nassataat aamma assartorneqarlutik.

Tamatumalu kingorna takornariartussat tikerlaat, Sea Spiritimut ilaasussat, qulimiguulimmik aamma Sarqardlernukaanneqarput. 

Takornariartut 200-t nalinginnaanngitsumik angalanerminni misigisaqarput, takornariataatileqatigiiffiullu Poseidon Expeditionsip pisortaata Air Greenland, Greenland Cruises suleqatigisartillu World of Greenland Arctic Circle nersualaangaatsiarpai.

- Suliami pikkorinngaarlutik suleqataasut tamarmik qutsavigaavut, Nikolay Saveliev Poseidon Expeditionip nittartagaani allappoq.