Naalakkersuisoq nunaqarfimmiunut: Utoqqatserpunga
Karrat Kangerluanni tassaarsuaqarsinnaaneranut aarlerinartorsiorfimmiittut nalorneqaat.
Nuunnissamut ikiorneqarsinnaanermik nalunaarfigineqaqqaarput. Taava Avannaata Kommunianit saaffigineqarput, nuussagunik illui Namminersorlutik Oqartussanit tiguneqassasut ingutserneqarlutillu.
Taava tamanna kukkunerusoq innuttaasullu illutik pigiinnassagaat aamma nalunaarfigineqarput. Ineqarnermut naalakkersuisoq, Naaja Nathanielsen tamatumunnga ajuusaarpoq.
- Inuunermi ajornartoorfimmiilluni paasisat eqqunngitsuusussaanngillat. Tamanna akuerineqarsinnaanngilluinnarpoq, taamaattumik utoqqatserusuttorujussuuvugut, Naaja Nathanielsen KNR-mut oqarpoq.
Ajornartorsiut allanneqanngitsoq
Inatsisartut aningaasaqarnermut akileraartarnermullu ataatsimiititaliaata immikkut aningaasaleeqqinnissamik maajip 28-anni suliaata akuerisaatalu iluani allaqqavoq, inuit nuukkusuttut inimik attartugassamik pissarsiniarneranni nuunnerannilu ikiorneqarsinnaasut.
Innuttaasut ima amerlatigisut nuunnissaminnut periarfissinneqassapput:
- Niaqornat: 35
- Qaarsut: 113
- Uummannaq: 10
- Saattut: 8
- Ukkusissat: 3
- Ikerasak: 7
- Nuugaatsiaq: Najugaqartoqanngilaq
- Illorsuit: Najugaqartoqanngilaq
Katillugit: 176
Paasissutissarsiffik: Naalakkersuisut
Ajornartorsiortitsilertorli allassimanngilaq. Pisortammi inuit pisortanut attartorlutik namminneq illuliamini najugallit pillugit imminut akerleriittoqartoq eqqumaffigisimanngilaat.
AAMMA ATUARUK Niaqornarmioq illut ingutserneqarnissaraluat pillugu utoqqatserfigineqarusuttoq
Inatsimmimi allaqqavoq pineqartut illuliaminni najugaqartussaatitaasut, nuukkunillu illu pigiinnarsinnaanngikkaat.
- Uani kukkussut tassaavoq, pisortanut attartorluni nammineq illuliorsimasunut najukkami najugaqartussaatitaanerup atorunnaarsinneqannginnera. Taannaana paatsuungalersitsisoq, Naaja Nathanielsen oqarpoq.
Akisussaatitserusunngitsoq
Taassuma ilassutitut aningaasaliissummi oqaasertat ilaqqikkusuppai, inunnut pineqartunut najugaqartussaatitaaneq atorunnaarsillugu, taamaalillutik nuukkusuttut nuukkunik illutik pigiinnarsinnaassammatigit.
- Najoqqutassiap sapaatit akunneranni tullermi piareernissaa naatsorsuutigivarput. Taava aalajangiinissamut najoqqutassaq taassuma kingorna inissisaaq. Tamassuma sukkasoorujussuarmik pinissaa neriuutigaara.
AAMMA ATUARUK Karrat: Illut aserorterneqassanngitsut
KNR-p kukkunermut kina akisussaasuunersoq naalakkersuisumut arlaleriarluni apeqqutigigaluarpaa, tamannali naalakkersuisup akerusunngilaa. Imali oqarpoq:
- Isumaqanngilanga kukkunerup suminngaanneernera paasiniartariaqanngitsoq. Tamassuma aaqqinnissaa uannut pingaarnerpaavoq.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.
