Niaqornarmioq illut ingutserneqarnissaraluat pillugu utoqqatserfigineqarusuttoq
Karrat Kangerluanni qaqqaq nakkaassagaluarpat tassaarsuaqarsinnaaneranut Niaqornani ulorianartorsiortoq, Ane Marie Møller illortik ingutserneqassasoq tusaraluarlugu nunaqarfini qimanniarunnaarlugu aalajangerpoq.
Pisortat illunik qimanneqartunik ingutserinissamik nuukkusuttunut nalunaarnertik kukkusuunerareeraluaraat nuukkusukkaluarnikoq isummaminik aalajangiusimannippoq.
- Tusarlerneqaratta soorunami unippugut, nammineq illoringatsigu. Uaguulluni annernarpoq. Taamannak tusarlerneqartut utoqqatserfigineqarnissarput kissaatigaarput, Ane Marie Møller KNR-mut oqarpoq.
Taanna isumaqarpoq, Niaqornanit nuukkaluarunik aallareersimalerunik pisortat ingutserinissamik nalunaaraluarnertik piviusunngortissagaat.
- Uaguulluni paasisariaqapoq, aallarutta aamma isuma allanngoqqissooq, soorlu assersuutigalugu aallarsimalerutta toqqissilersugut aamma imaassinnaagami illut qimatat isaterneqarsinnaasut.
AAMMA ATUARUK Koks i kommunikationen: Bygdeboere kan alligevel beholde deres huse
Taassuma aappani, panitsik ernutartillu illoqatigai. Illu namminneq sanavaat ukiullu kingulliit 27-it najorlugu. Ukiuni inuuffigisamini 53-ni Niaqornani najugaqartuaannarpoq Avannaata Kommunianiillu taama sianerfigineqaannarnini tupaqqassutigeqaa.
- Soorunami annernarpoq taamannak toqqaannartumik oqarfigineqarneq, illorsi nunguilluni nungulluni isaterneqassooq.
Nuukkusuttunut paasissutissat nalunaarutillu oqaasiinnartigut pisartut Niaqornaniiginnarusuttoq oqarpoq. Kommunimiit sianertoq Ane Marie Møllerimut oqarsimavoq, illunik isaterinissaq Namminersorlutik Oqartussat piumasaqaatigisimagaat.
- Sianerfigineqaannarpugut, taamaallaat nalunaarutit tusarliunneqartarput sianerfigineqaannarluta, allakkatigut tunniussanik takusaqanngiivippugut.
Illunik isaterinissaraluamik nalunaarneq sioqqullugu inuit 15-it Niaqornanit nuukkusunnikuupput, maannali sisamaannanngortut Avannaata Kommuniata allappoq.
KNR-mit ineqarnermut naalakkersuisoq, Naaja Nathanielsen apersorniaraluarparput mannali tikillugu suli iluatsinngilaq.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.
