Karrat: Illut aserorterneqassanngitsut
![](/sites/default/files/styles/image_934x467/public/article_images/7v9a6560.jpg?itok=G-Wym0AS)
Tassaarsuaqarsinnaaneranut ulorianartorsiorfimmiittut nuukkusullutik kissaateqartut nuuppata illuisa pisortanit tiguneqarlutillu aserorterneqarnissaat pisortanit pisussanngortinneqaraluarpoq. Tamannali Namminersorlutik Oqartussat Kommunillu atorfilittaasa attaveqatigiinnerannit kukkunerusoq, Avannaata Kommuniani borgmesteri oqarpoq.
- Illut qimataat qimappatigit aserorterneqarnissaat paatsooqatigiinnikkut pisimavoq. Taamaattumik uani erseqqissaatigissavara, innuttaasut nuuttussat illutik tigummiinnassavat, aamma illui isaterneqassanngillat, Palle Jerimiassen KNR-mut oqarpoq.
Innuttaasut ima amerlatigisut nuunnissaminnut periarfissinneqassapput:
- Niaqornat: 35
- Qaarsut: 113
- Uummannaq: 10
- Saattut: 8
- Ukkusissat: 3
- Ikerasak: 7
- Nuugaatsiaq: Najugaqartoqanngilaq
- Illorsuit: Najugaqartoqanngilaq
Katillugit: 176
Paasissutissarsiffik: Naalakkersuisut
Avananaata Kommuniata Namminersorlutik Oqartussat ataatsimeeqatigereernerisigut paasissutissat pissarsiatik innuttaasunut ingerlateqqittaraat borgmesteri nassuiaavoq.
Palle: Ineqarnermut naalakkersuisoqarfimminngaanneerpoq
Palle Jerimiassen illut aserorterneqarnissaannut aalajangiingaluarneq sapaatit akunnerisa siulianili paasisimavaa, borgmesterilu naapertorlugu tamanna ineqarnermut naalakkersuisoqarfimmiit aalajangerneqaraluarpoq.
- Allattoqarfimmi sapaatip akunnnera kingulleq ilisimatinneqarpugut ineqarnermut naalakkersuisoqarfimmi pisortat ataatsimeeqatigineranni illuutit nuuttut qimataat isaterneqassasut, Palle Jerimiassen oqarpoq.
Taassuma paatsooqatigiinneq qanoq pisinnaanersoq itisilerusunngilaa, tamannali Namminersorlutik Oqartussat Avannaata Kommuniatalu iluminni suliassarigaat borgmesteri oqarpoq.
KNR-mit ineqarnermut naalakkersuisoqarfimmeersut pisoq pillugu pissarsiariniarsarivagut sulili iluatsinnagit.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.