London Mining akuerineqartussanngorpoq

Inuussutissarsiornermut Aatsitassanullu naalakkersuisoqarfimmi pisortap, Jørn Skov Nielsenip, aviisimut Berlingske Businessimut ullumi uppernarsarpaa, London Mining isumaqatiginiarneqartoq, annerusumilli oqaaseqarusunngilaq.

Ukiuni pingasuni sanaartornissamut 13 milliardit koruuninik aningaasaliinissaq suli qulakkeerneqanngilaq, suliffeqarfinnillu allanik aningaasaleeqataasussanik aamma suli tutsaqartoqanngilaq, soorlu piginneqataasussanik. Piiaaffissamillu sanasoqarnavianngilaq, aatsitassarsiorfik London Mining aningaasaliisussanik pissarsitinnagu.

Isukasiani piiaanissamik London Miningip najoqqutassaa pissutigalugu sanaartornissamut aningaasaliisussanik ujaasinissaq pisariaqarpoq. London Miningili unammillertimisulli aningaasaliisussarsiorpoq.

Tuluit suliffeqarfiutaat taanna Kinami, USA-mi, Danmarkimi Nunanilu Avannarlerni allani ilippanaatilinnik aningaasaliisussarsiorpoq.

Tamanna ajornaatsuinnaanngilaq. Savimineq ukiuni kingullerni akikillerujussuarsimavoq. London Mining Isukasiani piiaaffiliorniarnermi nunarsuaq tamakkerlugu saviminissarsiortunik allanik 50-inik unammillerteqarpoq, taakku aamma aningaasaliisussarsiormata.

Ukiuni pingasuni sanaartortoqassaaq, 1.000-it 2.500-llu akornanni sulisoqassalluni. Taakku amerlanersaat nunanit allaninngaanneersuussapput. Ukiut marluk sanaartortoqareerpat 2.500-it sulisorineqarnissaat naatsorsuutigineqarpoq.

Saviminissarsiorfik aallartippat 450-it sulisorineqarnissaat naatsorsuutigineqarpoq.